Польшанинг Кракова шаҳрида истиқомат қилувчи аёл дарахтда осилиб турган круассанни ноодатий ҳайвон деб ўйлаб, ҳайвонларни қутқариш хизматини ёрдамга чақирди, деб хабар беради Esquire.
Таъкидланишича, ҳайвонларни қутқариш хизматига хавотирга тушган бир аёл мурожаат қилиб, уй олдидаги настарин бутасида икки кундан буён жигарранг жонзот ўтирганини билдирган. Аёл уй аҳолиси ойналарини очишга қўрқаётганини маълум қилган.
Телефон орқали ҳодиса билан танишган оператор бу игуан (калтакесаклар оиласига кирувчи жонзот) бўлиши мумкинлигини тахмин қилган. Бироқ рептилиянинг баҳордаги тунги совуқлар сабаб кўчада омон қолиши даргумон.
Воқеа жойига етиб келган инспекторлар настарин шохларига оддий круассан илиниб қолганини аниқлаган. Мутахассисларнинг тахминича, уни кимдир қушларни овқатлантириш учун ойнадан улоқтирган.
Аввалроқ австралиялик аёл денгиз қирғоғида тухумга ўхшаш сирли жонзотга дуч келгани тўғрисида хабар берилганди.
Изоҳ (0)