Туркия июнь ойида «Истанбул» канали қурилиши лойиҳасини амалга оширишни бошлаши мумкин. Бу ҳақда мамлакат президенти Ражаб Тоййиб Эрдўғон 16 апрель куни, жума намозидан кейин журналистларга маълум қилди, деб ёзади «ТАСС».
«Биз ‘Истанбул’ канали қурилишини канални кесиб ўтувчи кўприкларни қуриш билан бошламоқчимиз. Умид қиламанки, июнь ойида шундай кўприклардан бирини қуриш ишларини бошлаймиз», — деди Туркия раҳбари.
Эрдўғон лойиҳалаштирилган каналнинг иккала томонида кўприклар қуриш жараёни бошланиши зарурлигига ишора қилди. Шунингдек, у Туркия «Истанбул» канали лойиҳаси хорижий сармояларни жалб қилмасдан амалга оширилишига умид қилаётганини қўшимча қилди.
14 апрель куни Туркия президенти Тоййиб Эрдўғон лойиҳалаштирилган «Истанбул» канали Монтрё конвенциясига тааллуқли эмаслигини эълон қилган.
1936 йилда имзоланган Монтрё конвенцияси мамлакатлар юк кемаларининг Босфор ва Дарданел бўғозларидан фойдаланишини тартибга солади. Бу Туркияга ўз чегараларидаги бўғозларни бошқариш ҳуқуқини беради ва уларга тинчлик даврида фуқаролик кемаларининг киришини кафолатлаб, ҳарбий-денгиз кемаларининг киришини чеклайди. Туркиянинг Истанбул шимолидаги Қора денгизни жанубдаги Мармара денгизи билан боғлайдиган улкан «Истанбул» каналини қуриш лойиҳаси аслида конвенция шартларига зид ҳисобланади.
Аввалроқ мазкур масалада ҳукуматни танқид қилган собиқ адмираллар (ҳарбий флотдаги олий унвон соҳиби) ҳибсга олинган эди. Кейинроқ Анқара суди провинцияни тарк этмаслик шарти билан адмиралларни озод қилди.
Эслатиб ўтамиз, Россия президенти Владимир Путин ва Туркия президенти Ражаб Тоййиб Эрдўғон видеоконференцалоқа режимида Туркиядаги «Аккую» атом электр станцияси (АЭС)нинг учинчи энергия блоки қурилишига старт берди. Туркия президенти станциянинг сўнгги блокини қуриш 2022 йилга режалаштирилганини маълум қилган.
Изоҳ (0)