O‘zbekiston IIV internetda jinoyatlarga qarshi kurashish bo‘limi nomidan foydalanib, fuqarolardan bank kartasiga 240 ming so‘m miqdorida pul o‘tkazish so‘ralayotganidan ogohlantirdi.
Vazirlik matbuot xizmatining qayd etishicha, tarqalgan xabarlarda bu pullar “turli xil taqiqlangan materiallarni tarqatuvchi elementlar, shu jumladan, zo‘ravonlik, shafqatsizlikni targ‘ib etuvchi, pornografiyani o‘z ichiga olgan” va hokazolar bilan kurashish uchun zarur ekanligi aytilmoqda.
“Hurmatli fuqarolar! Ushbu turdagi xabarlarga tanqidiy munosabatda bo‘lishingizni iltimos qilamiz. Ichki ishlar organlari fuqarolardan hech qanday hisob raqamiga pul o‘tkazmalarini amalga oshirishni so‘rashmaydi! Biz buni rasmiy ravishda e’lon qilamiz”, — deyiladi IIV xabarida.
Vazirlik shunday mazmundagi xabarnoma kelsa, yaqin atrofdagi ichki ishlar bo‘limiga xabar berishni so‘ragan.
Eslatib o‘tamiz, 2020-yilda “O‘zkomnazorat” koronavirus sababli internet tarmog‘ida firibgarliklar ko‘payayotgani haqida ogohlantirgan edi. Jumladan, fuqarolarga karantin qoidalarini buzganligi haqida SMS jo‘natib, pul undirmoqchi bo‘layotgan firibgarlar paydo bo‘lgandi.
Izoh (0)