Ўзбекистон ИИВ интернетда жиноятларга қарши курашиш бўлими номидан фойдаланиб, фуқаролардан банк картасига 240 минг сўм миқдорида пул ўтказиш сўралаётганидан огоҳлантирди.
Вазирлик матбуот хизматининг қайд этишича, тарқалган хабарларда бу пуллар «турли хил тақиқланган материалларни тарқатувчи элементлар, шу жумладан, зўравонлик, шафқатсизликни тарғиб этувчи, порнографияни ўз ичига олган» ва ҳоказолар билан курашиш учун зарур эканлиги айтилмоқда.
«Ҳурматли фуқаролар! Ушбу турдаги хабарларга танқидий муносабатда бўлишингизни илтимос қиламиз. Ички ишлар органлари фуқаролардан ҳеч қандай ҳисоб рақамига пул ўтказмаларини амалга оширишни сўрашмайди! Биз буни расмий равишда эълон қиламиз», — дейилади ИИВ хабарида.
Вазирлик шундай мазмундаги хабарнома келса, яқин атрофдаги ички ишлар бўлимига хабар беришни сўраган.
Эслатиб ўтамиз, 2020 йилда «Ўзкомназорат» коронавирус сабабли интернет тармоғида фирибгарликлар кўпаяётгани ҳақида огоҳлантирган эди. Жумладан, фуқароларга карантин қоидаларини бузганлиги ҳақида SMS жўнатиб, пул ундирмоқчи бўлаётган фирибгарлар пайдо бўлганди.
Изоҳ (0)