Namangan viloyati Mingbuloq tumanida joylashgan kafeda ishlovchi qizga shilqimlik qilgan shaxslar ularni bundan qaytargan fuqarolar bilan janjallashib ketdi, deya xabar bermoqda Tergov departamenti.
Qayd etilishicha, 2021-yilning 5-aprel kuni soat 21:00 larda 25 yoshli G‘.I. 24 yoshli Q.A. va 22 yoshli E.J. Mingbuloq tumani “Kichik Jomasho‘y” mahallasida joylashgan jamoat joyi hisoblangan “Vodiy” umumiy ovqatlanish oshxonasida ularga xizmat ko‘rsatayotgan 19 yoshli Y.G. ismli qizga shilqimlik qilib, uning sochidan ushlab tortgan.
Shuningdek, ularni tinchlantirmoqchi bo‘lgan 31 yoshli B.Z.ni hech bir sababsiz urib do‘pposlagan va ularning bezorilik harakatlarining oldini olmoqchi bo‘lgan 46 yoshli N.A. va 27 yoshli S.B.ga qarshilik ko‘rsatib, ularni ham urib, pichoq bilan S.B.ning son qismiga jarohat yetkazgan.
Sud tibbiy ekspertiza xulosasida B.Z. va N.A. “yengil” hamda S.B. “o‘rtacha og‘ir” tan jarohatlari olgani ko‘rsatilgan.
Mazkur holat yuzasidan Mingbuloq tuman IIB huzuridagi tergov bo‘limi tomonidan G‘.I., Q.A. va E.J.ga nisbatan Jinoyat kodeksining 277-moddasi 3-qismi “a, g” bandlari (bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib, takroran sodir etilgan bezorilik) bilan jinoyat ishi qo‘zg‘atilib, protsessual tartibda ushlangan.
Tergov harakatlari jarayonida G‘.I., Q.A. va E.J. ushbu umumiy ovqatlanish oshxonasida ofitsiant bo‘lib ishlovchi Y.G.ni ular bilan birgalikda bir stolda o‘tirib, ovqatlanishga majburlab, turli uyatli xatti-harakatlar sodir etganliklari sababli ushbu jinoyat kelib chiqqanligi aniqlangan.
Hozirda tergov davom etmoqda.
Bundan avval Toshkentda 17 yoshli bola o‘z tengdoshini pichoqlab qo‘ygani, Jizzaxdagi restoranda raqs tushayotgan yigitlar qo‘llari bir-biriga tegib ketishi sababli janjallashib ketgani hamda Olmazorda voyaga yetmagan bola tengdoshini pichoqlab qo‘ygani haqida xabar berilgandi.
Izoh (0)