Toshkent shahridagi 4 ta issiqlik stansiyasini Siemens AG bilan hamkorlikda zamon talablari asosida yangilash rejalashtirilmoqda. Poytaxt hokimligi matbuot xizmatining xabar berishicha, bu haqda 16-aprel kuni Toshkent shahar hokimligida Germaniyaning Siemens AG mutasaddilari bilan o‘tkazilgan uchrashuvda ma’lum qilindi.
Uchrashuvda Siemens AG bilan energetika yo‘nalishidagi hamkorlik, xususan, elektrostansiyalar, issiqlik elektronstansiyalarini qurish, vodorod yoqilg‘isi yo‘nalishini rivojlantirish kabi qator sohalardagi hamkorlik masalalari atroflicha ko‘rib chiqilib, muhokama qilingan.
Qayd etilishicha, O‘zbekistondagi qator vazirliklar va Toshkent shahar hokimligi Siemens AG bilan davlat-xususiy sherikchilik asosida munosabatga kirishishga tayyor. Hamkorlikdagi loyihalar faqat texnika-texnologiya kiritish hisobiga emas, balki birgalikda ishlash asosida rivojlanadi. Zarur hollarda nemis texnikasiga xizmat ko‘rsatuvchi servis markazlari ochiladi, mahalliy mutaxassislar o‘qitiladi.
Uchrashuvda, shuningdek, energetik barqarorlikni oshirish, aholini uzluksiz elektr va issiqlik energiyasi bilan ta’minlash, bunga xizmat qiluvchi maskanlar holati va sharoitini to‘liq o‘rganib chiqib, ularni bosqichma-bosqich zamonaviy talablar asosida ishlatishga o‘tkazish ham muhokama qilingan.
Siemens AG muqobil energiya va vodorod yoqilg‘isini rivojlantirish borasida ham yetakchilardan hisoblanadi. Shu nuqtayi nazardan yig‘ilishda, bu yo‘nalishlarda ham hamkorlikni yo‘lga qo‘yish istiqbolli ekanligi ta’kidlanib, muhokama etilgan barcha masalalar Siemens AG mutasaddilari bilan imzolanadigan kelishuvlarga kiritilishi ma’lum qilingan.
Avvalroq Toshkent viloyatida Turkiyaning Cengiz Enerji kompaniyasi 2022-yilga kelib quvvati 240 MVt bo‘lgan issiqlik elektr stansiyasini qurishi haqida xabar berilgan edi.
Mavzuga doir: O‘zbekistonda vodorod energetikasi rivojlantiriladi
Izoh (0)