Тошкент шаҳридаги 4 та иссиқлик станциясини Siemens AG билан ҳамкорликда замон талаблари асосида янгилаш режалаштирилмоқда. Пойтахт ҳокимлиги матбуот хизматининг хабар беришича, бу ҳақда 16 апрель куни Тошкент шаҳар ҳокимлигида Германиянинг Siemens AG мутасаддилари билан ўтказилган учрашувда маълум қилинди.
Учрашувда Siemens AG билан энергетика йўналишидаги ҳамкорлик, хусусан, электростанциялар, иссиқлик электронстанцияларини қуриш, водород ёқилғиси йўналишини ривожлантириш каби қатор соҳалардаги ҳамкорлик масалалари атрофлича кўриб чиқилиб, муҳокама қилинган.
Қайд этилишича, Ўзбекистондаги қатор вазирликлар ва Тошкент шаҳар ҳокимлиги Siemens AG билан давлат-хусусий шерикчилик асосида муносабатга киришишга тайёр. Ҳамкорликдаги лойиҳалар фақат техника-технология киритиш ҳисобига эмас, балки биргаликда ишлаш асосида ривожланади. Зарур ҳолларда немис техникасига хизмат кўрсатувчи сервис марказлари очилади, маҳаллий мутахассислар ўқитилади.
Учрашувда, шунингдек, энергетик барқарорликни ошириш, аҳолини узлуксиз электр ва иссиқлик энергияси билан таъминлаш, бунга хизмат қилувчи масканлар ҳолати ва шароитини тўлиқ ўрганиб чиқиб, уларни босқичма-босқич замонавий талаблар асосида ишлатишга ўтказиш ҳам муҳокама қилинган.
Siemens AG муқобил энергия ва водород ёқилғисини ривожлантириш борасида ҳам етакчилардан ҳисобланади. Шу нуқтаи назардан йиғилишда, бу йўналишларда ҳам ҳамкорликни йўлга қўйиш истиқболли эканлиги таъкидланиб, муҳокама этилган барча масалалар Siemens AG мутасаддилари билан имзоланадиган келишувларга киритилиши маълум қилинган.
Аввалроқ Тошкент вилоятида Туркиянинг Cengiz Enerji компанияси 2022 йилга келиб қуввати 240 МВт бўлган иссиқлик электр станциясини қуриши ҳақида хабар берилган эди.
Мавзуга доир: Ўзбекистонда водород энергетикаси ривожлантирилади
Изоҳ (0)