Farg‘ona hamda Surxondaryo viloyatlari hokimlariga yangi maslahatchilar tayinlandi. Bu haqda “Daryo” muxbiri xabar berdi.
Yusufjon Kamolov Farg‘ona viloyati hokimining jamoatchilik bilan ishlash bo‘yicha maslahatchisi lavozimiga tayinlandi.
Ma’lum bo‘lishicha, Yusufjon Kamolov tayinlovga qadar Farg‘ona viloyati Arxiv ishi hududiy boshqarmasi boshlig‘i vazifasida ishlagan. Shuningdek, u O‘zbekiston tumani hokimligida, viloyat Iqtisodiyot bosh boshqarmasida, viloyat hokimligida turli mas’ul lavozimlarda mehnat qilgan. 2014—2019-yillarda Farg‘ona viloyati davlat arxivi boshlig‘i, 2019-yilda Toshkent shahar davlat arxivi boshlig‘i vazifasida faoliyat yuritgan.
Shuningdek, Surxondaryo viloyati hokimining 2021-yil 6-apreldagi qarori bilan Faxriddin Mengliyev To‘ra Bobolovning jamoatchilik bilan ishlash bo‘yicha maslahatchisi etib tayinlandi.
Ta’kidlanishicha, Faxriddin Mengliyev 1982-yil Surxondaryo viloyatining Sho‘rchi tumanida tug‘ilgan bo‘lib, 2006-yil Ichki ishlar akademiyasini, 2013-yili akademiyaning Oliy akademik kursini tamomlagan. Mutaxassisligi bo‘yicha huquqshunos.
Tayinlovga qadar u viloyat IIB boshlig‘i o‘rinbosari, bir vaqtning o‘zida viloyat mahalla va oilani qo‘llab-quvvatlash boshqarmasi boshlig‘i o‘rinbosari lavozimlarida faoliyat yuritib kelgan.
Faxriddin Mengliyev turli yillar davomida viloyat IIB tizimida mas’ul lavozimlarda — Tergov boshqarmasi boshlig‘ining birinchi o‘rinbosari, tashkiliy-inspektorlik bo‘limi, tashkiliy-inspektorlik va axborot-tahlil bo‘limi, tashkiliy boshqarma, shuningdek, Muzrabot tumani ichki ishlar bo‘limi boshlig‘i vazifalarida ishlagan.
Izoh (0)