Rossiyada ishlash uchun qurilish kompaniyalari tomonidan chet eldan maxsus olib kelingan quruvchilarning uchdan bir qismigacha bo‘lgan qismi boshqa sohalarga ayniqsa, maoshi yuqori bo‘lgan kuryerlik ishiga o‘tib ketadi. Bu haqda Rossiyaning “Inteko” kompaniyalar guruhi rahbari Aleksandr Nikolayev “RBK”ga bergan intervyusida aytib o‘tdi.
Nikolayevning so‘zlariga ko‘ra, bu qurilish sohasi uchun “ulkan muammo” bo‘lib qolmoqda. U kuryerlarning ish haqi quruvchilarning ish haqidan yuqori yoki u bilan solishtirish mumkin, ammo yetkazib berishda ishlash “obyektiv ravishda osonroq”, “12 soat davomida qattiq ishlash” shart emasligini aytib o‘tdi. Qurilish vazirligi huzuridagi jamoat kengashi a’zosi bo‘lgan Nikolayevning ta’kidlashicha, ushbu muammo ham tegishli vazirlik, ham Ichki ishlar vazirligi va boshqa davlat idoralari bilan muhokama qilinmoqda.
Pandemiyadan oldin Moskvada bitta ishchi kompaniyaga o‘rtacha 50—60 ming rubl (658—790 dollar)ga tushgan bo‘lsa, endi ishchilarning narxi 100—110 ming rubl (1317—1449 dollar)gacha o‘sdi, deydi Nikolayev. Uning so‘zlariga ko‘ra, xarajatlar ish haqining oshishi hisobiga ham, mamlakatga quruvchilarni olib kirish xarajatlari hisobiga ham oshgan. “Ishchilarni olib kelish, joylashtirish, ovqat, suv bilan ta’minlash, tibbiy sug‘urta uchun pul to‘lash, patent uchun pul to‘lash kerak”, — deb sanab o‘tdi Nikolayev.
“hh.ru” xabariga ko‘ra, 2020-yilda Moskvada qurilish va pardozlash ishlari bo‘yicha bir mutaxassisning o‘rtacha ish haqi 64,4 ming rubl (taxminan, 843 dollar)ni tashkil etgan. Hududlarda o‘rtacha ish haqi darajasi 58,9 ming rubl (taxminan, 763 dollar) bo‘lgan. “A101” kompaniyalar guruhining rivojlanish departamenti direktori Pavel Turkovning so‘zlariga ko‘ra, qurilish maydonchasidagi daromad oyiga 90 ming rublni (1185 dollar) tashkil qilishi mumkin.
Kuryerlarning ish haqi bo‘yicha takliflari 2019-yil apreldan 2020-yil oxirigacha 35 dan 45 ming rublgacha (o‘rtacha 526 dollar) ko‘tarilgan. Shu bilan birga, SuberJob ma’lumotlariga ko‘ra, Moskvada kuryerlar piyoda 80 ming rubl (1053 dollar)gacha, shaxsiy mashinasi bilan esa 100 ming rublgacha (1317 dollar) pul ishlashi mumkin.
Qurilish maydonlarida ishchilar yetishmasligi muammosi dolzarb bo‘lib qolmoqda, deya xulosa qiladi Nikolayev. “Qaysi turdagi ishchi kuchining yetishmasligi haqida turli manbalarda turli xil raqamlar aytib turadi. Shunga qaramay, bu nafaqat turar joy qurilishida, balki umuman qurilish sohasida yuz minglab odamlarni tashkil qiladi”, — deya ta’kidlaydi u.
Pudratchi kompaniyalar ishchilar uchun raqobatlashadi: agar ishchilarga yanada mo‘mayroq daromad taklif etilsa, ular boshqa qurilish maydonchasiga ko‘chib o‘tishi mumkin, deydi “Granel” kompaniyalar guruhining qurilish bo‘yicha direktori Andrey Zimonov. Ammo Zimonovning so‘zlariga ko‘ra, “Granel”ning pudratchilari olib kelgan quruvchilarda kasbini o‘zgartirish holati yuz bermagan.
Moskvadagi qurilish maydonlarida MDH mamlakatlaridan qurilish mutaxassisliklari bo‘yicha ishchilarni jalb qilish muammosi saqlanib qolmoqda, deydi Turkov. Ammo Turkov buning sababini MDH davlatlari quruvchilarining O‘zbekiston, Qozog‘iston, Ozarbayjon va boshqa mamlakatlarda yirik va faol rivojlanayotgan qurilish loyihalari ko‘rinishidagi alternativga ega bo‘lishida ko‘radi.
“Koronavirus tahdidi hanuzgacha saqlanib qolmoqda, ko‘pchilik ishchilar buni Moskvadagi qurilish loyihalarini to‘xtatuvchi xavf deb biladi va mazkur sharoitda ular iqlim va ruhiy jihatdan yaqinroq muhitda, virus cheklovlari unchalik qattiq bo‘lmagan mamlakatlarda ishlashni tanlaydi”, — dedi Torkov.
“RBK” xabar berishicha, Qurilish vazirligi yanvar oyida uy-joy va infratuzilma obyektlarini qurish uchun Rossiyaga xorijiy fuqarolarni olib kirish mexanizmini ishga tushirgan. Quruvchilar asosan O‘zbekiston, Tojikiston va Qozog‘istondan keladi. Bosh vazir o‘rinbosari Marat Husnullin mehnat muhojirlarining chiqib ketishi Rossiyada 2020-yilda uy-joy narxlari ko‘tarilishining asosiy sabablaridan biri bo‘lganini bir necha bor ta’kidlagan. Aprel oyida prezident Vladimir Putin Federal Monopoliyaga qarshi kurashish xizmatiga Rossiyada uy-joy narxlarining ko‘tarilishini tekshirishni buyurdi: o‘tgan yil davomida kvartiralar narxi o‘rtacha 12 foizga o‘sgan, ayrim hududlarda o‘sish 20—30 foizga yetgan.
Izoh (0)