“Xalq so‘zi online” Sirdaryo viloyatining Guliston shahrida O‘zbekiston ismli insonning farzandlari va nabiralari yashayotgani to‘g‘risida ma’lumot berdi.
Nashrning yozishicha, shahardagi 12-maktab direktori Malika Alimardonova O‘zbekistonovna bo‘lib, u O‘zbekiston ismli insonning farzandi hisoblanadi.
“Bo‘riboy bobom Mirzacho‘lni yoppasiga o‘zlashtirishdan avval Guliston tumaniga, hozir biz avlodlari yashayotgan mahallaga ko‘chib kelgan. U vaqtlari bu yerlar yaydoq bo‘lgan. Bobom va ular bilan birga mehnat qilganlarning fidoyiligi tufayli keyinchalik cho‘l o‘rni bo‘stonga aylangan. Bobom ko‘p yillar brigadirlik qilgan. Rahmatli otam u kishining uchinchi farzandi, 1949-yilda tug‘ilgan. Lomonosov nomidagi Moskva davlat universiteti va yana bir necha oliy o‘quv yurtlarida o‘qigan. Mahallamizdagi yirik parrandachilik fabrikasida iqtisodchi, Yangiyerdagi ana shunday xo‘jalikda esa direktor bo‘lib ishlagan”, — deydi Malika Alimardonova.
Malika Alimardonovaning aytishicha, Bo‘riboy boboning to‘ng‘ich farzandi Rustam Moskva davlat universitetida ta’lim olgan. Ikkinchi o‘g‘lining ismi esa Doston, kenjasiga Ulug‘bek deb ism qo‘ygan.
Ta’kidlanishicha, Bo‘riboy bobo nabiralaridan biriga Guliston deb ham ism qo‘ygan — Mirzacho‘l bag‘rida qad ko‘targan ko‘rkam shahar sharafiga. Guliston O‘zbekiston o‘g‘li hozir o‘qituvchilik qilmoqda. “Bobomning ‘Men ketmonchi bo‘lib o‘tayotgan bo‘lsam, sizlarning qo‘lingizda qalam-u kitob bo‘lsin’ degan nasihatlari u kishining barcha avlodlari uchun umr maqsadiga aylangan”, — deydi Malika Alimardonova.
Ma’lum qilinishicha, yaqinda karate bo‘yicha respublika musobaqasida O‘zbekiston boboning nabirasi, 4-sinf o‘quvchisi Baxtiyor ikkinchi o‘rinni egallagan, g‘oliblarni e’lon qilish asnosida “Baxtiyor O‘zbekistonov” degan ism-familiya o‘zgacha viqorli va ulug‘vor jaranglagan.
Izoh (0)