O‘zbekiston Tibbiy-ijtimoiy xizmatlarni rivojlantirish agentligi rahbariyati tayinlandi
O‘zbekiston hukumatining 13-apreldagi qarori bilan Tibbiy-ijtimoiy xizmatlarni rivojlantirish agentligi rahbariyati tayinlandi, deb xabar bermoqda Adliya vazirligi matbuot xizmati.
Tibbiy-ijtimoiy xizmatlarni rivojlantirish agentligining direktori etib Alisher Inakov tayinlandi. Tayinlovga qadar u Sog‘liqni saqlash vazirligi huzuridagi Tibbiy-ijtimoiy xizmatlar agentligi direktori vazifasini vaqtincha bajaruvchi bo‘lgan.
Agentlik direktorining tibbiy-ijtimoiy masalalari bo‘yicha birinchi o‘rinbosari etib Tibbiy-ijtimoiy xizmatlar agentligi direktori o‘rinbosari vazifasini vaqtincha bajaruvchi bo‘lgan Bahodir Karimov tayinlandi.
G‘ayrat Isroilov agentlik direktorining moliyaviy-iqtisodiy va qurilish masalalari bo‘yicha o‘rinbosari bo‘ldi. Tayinlovga qadar Vazirlar Mahkamasi Makroiqtisodiy tahlil, tarkibiy o‘zgartirishlar, moliya-bank tizimi, davlat aktivlarini boshqarish, raqobatni rivojlantirish, tadbirkorlarni qo‘llab-quvvatlash va kambag‘allikni qisqartirish masalalari kotibiyatining Pensiya ta’minoti va kam ta’minlangan oilalar masalalari bo‘yicha bosh mutaxassisi sifatida faoliyat yuritgan.
Eslatib o‘tamiz, Prezidentning 2021-yil 25-martdagi “Keksa va nogironligi bo‘lgan shaxslarni ijtimoiy qo‘llab-quvvatlash, ‘Saxovat’ va ‘Muruvvat’ internat uylari tizimini yanada rivojlantirish to‘g‘risida”gi farmoniga asosan Sog‘liqni saqlash vazirligi huzuridagi Tibbiy-ijtimoiy xizmatlar agentligi va uning hududiy bo‘linmalari negizida Tibbiy-ijtimoiy xizmatlarni rivojlantirish agentligi va uning hududiy bo‘linmalarini tashkil etish belgilangan edi.
Tibbiy-ijtimoiy xizmatlarni rivojlantirish agentligi keksalar, nogironligi bo‘lgan shaxslar va aholining ijtimoiy himoyaga muhtoj boshqa toifalariga tibbiy-ijtimoiy xizmatlar ko‘rsatish sohasida vakolatli davlat boshqaruv organi hisoblanadi. Agentlik o‘z faoliyatida Vazirlar Mahkamasiga bo‘ysunadi va hisobot beradi.
