Madonnaning Los-Anjelesdagi ikki qavatli koshonasiga sayohat (foto)

Gollivud yulduzlari orasida shohona qasrda yashaydiganlar kam emas. 10 yildan buyon Nyu-York, Lissabon va Xemptonsda yashab kelayotgan jahon yulduzi Madonna ham Los-Anjelesdan koshona sotib olishga qaror qildi. 62 yoshni qarshilagan xonanda 27 yashar sevgilisi Ahlamalik Uilyams hamda 4 nafar farzandi bilan Los-Anjelesning bir qismi bo‘lgan Hidden-Hilz shahriga ko‘chib o‘tdi.

Ma’lumotlarga ko‘ra, xonanda hashamatli ko‘chmas mulkni agentlikdan emas, balki to‘g‘ridan to‘g‘ri uyning avvalgi egasi bo‘lmish “The Weeknd” taxallusli qo‘shiqchidan sotib olgan.

Aytgancha, yulduzlar uzoq vaqtdan buyon savdolashib kelishgan. Weeknd deyarli to‘rt yil avval uyni 18,2 million dollarga sotib olgan va unga dastlab 25 million dollar baho bergan. Ammo oradan vaqt o‘tib, uyning narxi 22 million dollarga tushgan. Keyinroq Madonna uni yanada arzonroqqa sotishga ko‘ndirdi.

To‘qqiztadan yotoqxona va hammomdan iborat 1171 kvadrat metrli qasr 1,2 gektar maydon kengligida joylashgan.

Ochiq rang va tabiiy yog‘och bilan ishlangan uy ikki qavatdan iborat.

Qasr beshta mashinaga mo‘ljallangan avtoturargoh, katta mehmonxona, ofis, kutubxona, uy kinoteatri hamda ikkita keng oshxonaga ega.

Uyning tom qismida nafaqat quyosh botishini tomosha qilish mumkin bo‘lgan o‘rindiqlar, balki basketbol maydonchasi ham mavjud.

Shuningdek, kechki payt dam olish uchun uyning orqa qismida atrofi divan va barbekyu bilan jihozlangan hovuzni ko‘rish mumkin.