Turk aktyori Burak Sergen salomatligi yomonlashgani sabab shifoxonaga olib ketildi.
O‘zbek muxlislariga “Sevgi iztirobi” serialidagi roli bilan yaxshi tanish bo‘lgan, ayni vaqtda “Sadoqatsiz” serialida suratga tushayotgan aktyor bugun, 13-aprel kuni o‘zini yomon his qilgan. Oila a’zolari tomonidan chaqirilgan tez yordam uni Istanbuldagi Liv Hospital shifoxonasiga olib ketgan.
Boshqa suratga olish maydonchalarida bo‘lgani singari “Sadoqatsiz” ijodkorlari ham sal avvalroq koronavirusga test topshirgan. Ammo tahlil natijasi salbiy chiqqan. OAVda esa shifoxonada bo‘lgan aktyorda COVID-19 testi ijobiy chiqqani haqida ma’lumot tarqalgan. Shundan keyin uning rafiqasi Nina Unsal turmush o‘rtog‘ining ahvoli haqida Instagram sahifasida xabar bergan. Burak topshirgan testning har ikkisida ham virus aniqlanmagani, ayni vaqtda u jonlantirish bo‘limida shifokorlar nazorati ostidaligini, o‘pkalarida aniqlangan infeksiya sabab nafas olishi qiyinlashganini ma’lum qilgan ayol noto‘g‘ri ma’lumot tarqatmaslik va eri uchun duo qilishlarini so‘ragan.
60 yashar aktyorning salomatligi yomonlashgani “Sadoqatsiz” serialining ssenariysiga ham ta’sir qiladi. 27-qism uning ishtirokisiz o‘tadi, keyingi qismlarda nima bo‘lishi esa voqealar rivojiga bog‘liq.
Izoh (0)