O‘zbekistonlik himoyachi Doston Tursunov Xitoyning “Chunsin Lyanszyan Atletik” klubiga o‘tdi. Bu haqda klub matbuot xizmati ma’lum qildi.
Markaziy himoyachi Janubiy Koreyaning “Pusan Ay Park” jamoasini erkin agent maqomida tark etib, xitoyliklar safiga borib qo‘shilgan.
“Chunsin Lyanszyan Atletik” 1995-yilda tashkil topgan bo‘lib, uy o‘yinlarini Chunsindagi “Olimpiya” (sig‘imi — 58,7 ming) stadionida o‘tkazib keladi. Jamoa 2017—2020-yillar mobaynida “Chunsin Danday Lifan” nomi bilan faoliyat yuritgan.
Jamoa Xitoy Superligasi 2020-yilgi mavsumida 6-o‘rinni qo‘lga kiritgandi.
Doston Tursunov — 1995-yilning 13-iyunida Farg‘ona viloyatining Oltiariq tumanida tug‘ilgan. Faoliyati davomida “Neftchi” (2015, 2017-2018), “Qo‘qon-1912” (2016), “Metallurg” (2017), “Renofa Yamaguchi” (Yaponiya, 2019) va “Pusan Ay Park” (2020) kabi jamoalarda to‘p surgan.
Avvalroq Odil Ahmedov Xitoy Superligasi a’zosi bo‘lgan “Chanchjou Mayti Layons” bilag shartnoma imzolagani ma’lum qilingandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)