Xalq deputatlari Toshkent shahar kengashining 2021-yil 27-martdagi qaroriga muvofiq, poytaxtda 2021-yil 1-apreldan 2021-yil 31-dekabrga qadar tashqi reklama obyektlari (konstruksiyalari)ni joylashtirish, o‘rnatish, o‘zgartirish va pasportlarining berilishiga moratoriy e’lon qilingani haqida xabar berilgan edi.
Tashqi reklama obyektlarida joylashgan e’lonlarning o‘ziga taalluqli bo‘lmagan mazkur moratoriy (ya’ni, shaharda shu vaqtgacha o‘rnatilgan billbordlarda bemalol yangi reklama joylashtirish mumkin, faqat xuddi shunday yangi billbordlarni o‘rnatish mumkin emas) “Toshkent shahrida o‘rnatilgan tashqi reklama obyektlari (konstruksiyalari)ni xatlovdan o‘tkazib, yagona elektron reyestrni shakllantirish maqsadida” joriy etildi.
“Moratoriy amal qilishi davomida yangi o‘rnatilgan tashqi reklama obyektlari (konstruksiyalari) noqonuniy hisoblanib, belgilangan tartibda demontaj qilinadi va ularni o‘rnatgan shaxslarga nisbatan choralar ko‘riladi”, — deyiladi Toshkent shahar hokimligi axborotida. O‘rni kelganda ta’kidlash joiz, noqonuniy tashqi reklama obyektlarini o‘rnatishga yo‘l qo‘ymaslik, shunday holatlar aniqlanganda ularni demontaj qilish, qonunbuzarlikka yo‘l qo‘yganlarga chora ko‘rish tadbirlari bugungidek moratoriy bo‘lmagan vaqtda ham amalga oshirilishi kerak.
O‘z vaqtida bunday qonunbuzarliklarga panja ortidan qaragan, ba’zan bilib, ba’zan bilmay reklama qonunchiligi oid talablarning buzilishiga yo‘l qo‘ygan “T.R.S” davlat unitar korxonasining sobiq rahbari A.I. bilan bog‘liq holat e’tiborga molik. O‘zAning yozishicha, u 2006—2018-yillarda korxonaga rahbarlik qilish bilan birga Toshkent shahar hokimligining Reklama va axborot faoliyati bo‘yicha komissiyasining mas’ul kotibi sifatida ishlagan.
A.I. qo‘l ostidagi xodimlarning vazifalariga loqaydlik bilan munosabatda bo‘lib, yuridik va jismoniy shaxslarga tashqi reklama vositalarini o‘rnatish uchun ajratilgan “Reklama joyining pasportlari” bo‘yicha oz emas, ko‘p emas, naq 700 qurilmaning belgilangan tartibda va muddatda o‘rnatilishi holatini o‘z vaqtida monitoring qilmagan. Oqibatda yuridik va jismoniy shaxslardan undirilishi lozim bo‘lgan 327,6 million so‘mdan ziyod mablag‘ tarif bo‘yicha hisoblanmagan va ushbu mablag‘larni undirish choralari ko‘rilmagan.
Shuningdek, A.I. Toshkent shahri hududida tashqi reklama va axborot vositalarini joylashtirish hamda ekspluatatsiya qilish bo‘yicha “T.R.S.” DUK bilan o‘nlab tashkilotlar o‘rtasida tuzilgan shartnomalar bo‘yicha 91,77 million so‘mlik ustama jarimalarni tekshiruv kuniga kadar undirish choralarini ko‘rmay, korxona manfaatlariga zarar yetkazgan. Bundan tashqari, u 51,2 million so‘mlik muddati o‘tgan debitor qarzdorlikka yo‘l qo‘yib, shundan 42,76 million so‘mini undirish choralarini ko‘rmaganligi natijasida davlat va jamiyat manfaatlariga ziyon yetkazgan.
Fuqaro A.I. 684 reklama joyining pasportlaridagi ma’lumotlarni qonunchilikka zid ravishda o‘zgartirib, ularga soxta ma’lumotlar kiritib, tegishli 90 ta xo‘jalik yurituvchi subyektga taqdim etgan. Buning natijasida 34 xo‘jalik yurituvchi subyektdan jami 29,8 million so‘m mablag‘ “T.R.S.” DUK foydasiga undirilmagan. Murojaatlarni qabul qilish va ko‘rib chiqishni qonunga xilof ravishda rad etish maqsadida jami 10 ta murojaat bo‘yicha reklama o‘rnatish uchun haqiqatda bo‘sh bo‘lgan joylarni yashirib, bo‘sh joylar haqida yolg‘on ma’lumotlar taqdim etgan.
Bu A.I.ga nisbatan ilgari surilgan ayblovlarning bir qismi, xolos.
A.I. sud hukmiga ko‘ra Jinoyat kodeksining 167-moddasi 2-qismining “v”, “g” bandlari, 207-moddasining 1-qismi, 205-moddasining 1-qismi, 209-moddasi 2-qismining “a” bandi va 144-moddasining 1-qismi bilan aybdor deb topilib, tayinlangan har xil turdagi jazolarni qisman qo‘shish yo‘li bilan unga uzil-kesil o‘tashi uchun ikki yil muddatga korxonalar, muassasalar yoki tashkilotlarda mansabdorlik lavozimlarini egallashdan mahrum qilish jazosi, eng kam oylik ish haqining 151 baravari miqdorida jarima jazosi, ish haqining‘ 20 foizi miqdorini davlat daromadi hisobiga ushlab qolgan holda 3 yil muddatga axloq tuzatish ishlari jazosi tayinlangan.
Izoh (0)