“Shakar muammosi rivojlangan davlatlarni ham zabt etmoqda. O‘zbekistonda-chi?” nomli maqola O‘zAda e’lon qilingan edi. Unda global muammoga aylanayotgan shakar muammosi tahlil qilingan. Bunday muammo O‘zbekistonda ham yuzaga kelishi mumkinmi? “Rost24.uz” “Angren shakar” MChJ ma’muriyatidan bunga javob oldi.
“O‘zbekistonda shakar muammosi bo‘lmaydi. Chunki shakar ishlab chiqarish hukumat siyosati darajasida qaralgani bois shakar ishlab chiqarish va yetkazib berish tizimli yo‘lga qo‘yilgan. 2014-yilda biz to‘liq shakar mustaqilligiga erishib bo‘lganmiz”, — deydi “Angren shakar” MChJ bosh direktori Rustam Akbarxo‘jayev.
Uning so‘zlariga ko‘ra, uzluksiz ishlab chiqarish tizimiga o‘tgan “Angren shakar” va “Xorazm shakar” zavodlari O‘zbekiston aholisining ehtiyoji uchun zarur bo‘lgan 700 ming tonnani yetkazib bermoqda. Ikkita shakar ishlab chiqaruvchi korxonamiz nafaqat aholini ta’minlash hattoki, eksport qilish imkoniyatiga ham ega.
“Muqobili yo‘q oziq-ovqatlar ro‘yxatining boshida turadigan shakar har doim ham siyosat darajasida jiddiy nazoratni talab qilib kelgan. Unga biroz e’tiborsizlik esa qanday oqibatlarga olib kelishini har bir davlatning hukumatdagilari yaxshi biladi. O‘zbekistonda koronavirus pandemiyasi davrida shakar muammosi biroz sezilgan edi. Xalqimizning shakarga bo‘lgan ehtiyojini qondirishni Prezidentimizning shaxsan o‘zlari nazoratga olganligi bois muammo darhol bartaraf etildi. Ayni damda esa O‘zbekistonda shakar tanqisligi sezilmayapti. Bu Prezidentimizning uzoqni ko‘zlab ish olib borishining samarasidir”, — deb ta’kidlagan Rustam Akbarxo‘jayev.
Uning aytishicha, narxda ham o‘zgarish yo‘q. “Angren shakar”dan birjaga chiqayotgan shakar narxi 7 120 so‘mni, “Xorazm shakar”niki esa 7 150 so‘mni tashkil etmoqda. “Xudo xohlasa, bundan keyin ham O‘zbekistondagi shakar narxida o‘zgarish (ko‘tarilish) bo‘lmaydi, deb ayta olaman. Xomashyo zaxiramiz yetarli”, — deb ta’kidlagan “Angren shakar” MChJ bosh direktori.
Eslatib o‘tamiz, “Ichki iste’mol bozorini asosiy turdagi oziq-ovqat mahsulotlari bilan kafolatli ta’minlashga doir qo‘shimcha chora-tadbirlar to‘g‘risida”gi hukumat qarorida 2021-yilda me’yor bo‘yicha ikki oylik ehtiyoj doirasida O‘zbekistonga 64 ming tonna shakar import asosida keltirilishi nazarda tutilgan.
Izoh (0)