Халқ депутатлари Тошкент шаҳар кенгашининг 2021 йил 27 мартдаги қарорига мувофиқ, пойтахтда 2021 йил 1 апрелдан 2021 йил 31 декабрга қадар ташқи реклама объектлари (конструкциялари)ни жойлаштириш, ўрнатиш, ўзгартириш ва паспортларининг берилишига мораторий эълон қилингани ҳақида хабар берилган эди.
Ташқи реклама объектларида жойлашган эълонларнинг ўзига тааллуқли бўлмаган мазкур мораторий (яъни, шаҳарда шу вақтгача ўрнатилган биллбордларда бемалол янги реклама жойлаштириш мумкин, фақат худди шундай янги биллбордларни ўрнатиш мумкин эмас) «Тошкент шаҳрида ўрнатилган ташқи реклама объектлари (конструкциялари)ни хатловдан ўтказиб, ягона электрон реестрни шакллантириш мақсадида» жорий этилди.
«Мораторий амал қилиши давомида янги ўрнатилган ташқи реклама объектлари (конструкциялари) ноқонуний ҳисобланиб, белгиланган тартибда демонтаж қилинади ва уларни ўрнатган шахсларга нисбатан чоралар кўрилади», — дейилади Тошкент шаҳар ҳокимлиги ахборотида. Ўрни келганда таъкидлаш жоиз, ноқонуний ташқи реклама объектларини ўрнатишга йўл қўймаслик, шундай ҳолатлар аниқланганда уларни демонтаж қилиш, қонунбузарликка йўл қўйганларга чора кўриш тадбирлари бугунгидек мораторий бўлмаган вақтда ҳам амалга оширилиши керак.
Ўз вақтида бундай қонунбузарликларга панжа ортидан қараган, баъзан билиб, баъзан билмай реклама қонунчилиги оид талабларнинг бузилишига йўл қўйган «Т.Р.С» давлат унитар корхонасининг собиқ раҳбари А.И. билан боғлиқ ҳолат эътиборга молик. ЎзАнинг ёзишича, у 2006—2018 йилларда корхонага раҳбарлик қилиш билан бирга Тошкент шаҳар ҳокимлигининг Реклама ва ахборот фаолияти бўйича комиссиясининг масъул котиби сифатида ишлаган.
А.И. қўл остидаги ходимларнинг вазифаларига лоқайдлик билан муносабатда бўлиб, юридик ва жисмоний шахсларга ташқи реклама воситаларини ўрнатиш учун ажратилган «Реклама жойининг паспортлари» бўйича оз эмас, кўп эмас, нақ 700 қурилманинг белгиланган тартибда ва муддатда ўрнатилиши ҳолатини ўз вақтида мониторинг қилмаган. Оқибатда юридик ва жисмоний шахслардан ундирилиши лозим бўлган 327,6 миллион сўмдан зиёд маблағ тариф бўйича ҳисобланмаган ва ушбу маблағларни ундириш чоралари кўрилмаган.
Шунингдек, А.И. Тошкент шаҳри ҳудудида ташқи реклама ва ахборот воситаларини жойлаштириш ҳамда эксплуатация қилиш бўйича «Т.Р.С.» ДУК билан ўнлаб ташкилотлар ўртасида тузилган шартномалар бўйича 91,77 миллион сўмлик устама жарималарни текширув кунига кадар ундириш чораларини кўрмай, корхона манфаатларига зарар етказган. Бундан ташқари, у 51,2 миллион сўмлик муддати ўтган дебитор қарздорликка йўл қўйиб, шундан 42,76 миллион сўмини ундириш чораларини кўрмаганлиги натижасида давлат ва жамият манфаатларига зиён етказган.
Фуқаро А.И. 684 реклама жойининг паспортларидаги маълумотларни қонунчиликка зид равишда ўзгартириб, уларга сохта маълумотлар киритиб, тегишли 90 та хўжалик юритувчи субъектга тақдим этган. Бунинг натижасида 34 хўжалик юритувчи субъектдан жами 29,8 миллион сўм маблағ «Т.Р.С.» ДУК фойдасига ундирилмаган. Мурожаатларни қабул қилиш ва кўриб чиқишни қонунга хилоф равишда рад этиш мақсадида жами 10 та мурожаат бўйича реклама ўрнатиш учун ҳақиқатда бўш бўлган жойларни яшириб, бўш жойлар ҳақида ёлғон маълумотлар тақдим этган.
Бу А.И.га нисбатан илгари сурилган айбловларнинг бир қисми, холос.
А.И. суд ҳукмига кўра Жиноят кодексининг 167-моддаси 2-қисмининг «в», «г» бандлари, 207-моддасининг 1-қисми, 205-моддасининг 1-қисми, 209-моддаси 2-қисмининг «а» банди ва 144-моддасининг 1-қисми билан айбдор деб топилиб, тайинланган ҳар хил турдаги жазоларни қисман қўшиш йўли билан унга узил-кесил ўташи учун икки йил муддатга корхоналар, муассасалар ёки ташкилотларда мансабдорлик лавозимларини эгаллашдан маҳрум қилиш жазоси, энг кам ойлик иш ҳақининг 151 баравари миқдорида жарима жазоси, иш ҳақининғ 20 фоизи миқдорини давлат даромади ҳисобига ушлаб қолган ҳолда 3 йил муддатга ахлоқ тузатиш ишлари жазоси тайинланган.
Изоҳ (0)