Бухоро вилояти Соғлиқни сақлаш бошқармаси ижтимоий тармоқларда вилоят юқумли касалликлар касалхонасининг абгор аҳволдаги биноси тасвирланган суратларга муносабат билдирди.
Telegram’даги Bukhara Info каналида Бухоро вилоят юқумли касалликлар касалхонасининг биноси тасвирланган суратлар эълон қилинган.
«Минг афсуски, бу коронавирусга чалинганлар учун мўлжалланган Бухородаги юқумли касалликлар шифохонасининг бўлими бўлиб, у ерга кексалар ҳам жойлаштирилади. Бирор изоҳ беришни ҳам билмаймиз. Илтимос, буни Бухоро вилояти ҳокими Ботир Зариповга кўрсатинг», — дейилади изоҳда.
Бухоро вилояти Соғлиқни сақлаш бошқармасининг маълум қилишича, эълон қилинган суратлар ҳақиқатда ҳам Бухоро вилоят юқумли касалликлар касалхонасининг энг эскирган биноси ҳисобланади. Бино 1984 йилда қурилган бўлиб, ҳозирда шифохонанинг орқа тарафида қолиб кетган ягона бир қаватли даволаш корпусидир.
«Чеккада бўлгани учун бошқа корпуслардан изоляция қилишга қулайлиги ҳисобга олинган ҳолда коронавирус инфекцияси билан касалланган беморлар шу ерга ётқизилмоқда. Бино эскилигига қарамасдан ичкаридаги палаталарда COVID-19 беморлари учун барча шароитлар стандарт талабларга мос ҳолда яратиб қўйилган», — дейилади муносабатда.
Таъкидланишича, ушбу бинони капитал таъмирлаш давлат Инвестиция дастурига киритилган ва бу иш 2021 йил май ойида амалга оширилиши режалаштирилган.
Шу билан бирга, вилоят ССБ сўнгги йилларда юқумли касалликлар касалхонасида қурилиш ва таъмирлаш ишлари олиб борилаётганидан далолат берувчи қатор суратларни ҳам тақдим этган.
Касалхона маъмурияти фотоайбномадаги кўриниш муассасанинг таъмирталаб сўнгги биноси эканини билдирган ҳолда яқин орада бу ҳолат бартараф этилишини маълум қилган.
Изоҳ (0)