Farg‘ona viloyatida bojxona boshqarmasi xodimlari tomonidan o‘tkazilgan tezkor tadbirda 2 ming 700 litr neft mahsulotining mamlakat hududidan noqonuniy tarzda olib chiqilishining oldi olindi. Bu haqda “Daryo”ga viloyat bojxona boshqarmasi axborot xizmati xabar berdi.
Ma’lum qilinishicha, Farg‘ona viloyati bojxona boshqarmasi Kontrabandaga qarshi kurashish va bojxona auditi bo‘limi xodimlari tomonidan Farg‘ona tumani hududida tezkor tadbir o‘tkazilgan.
Tezkor tadbir davomida fuqaro L.S. boshqaruvidagi “Vito” rusumli yuk avtomashinasi to‘xtatilib, ko‘zdan kechirilganda avtomashina yukxonasida tegishli hujjatlari bo‘lmagan, faqat maxsus avtotransport vositalarida tashishga ruxsat etilgan, 135 dona 20 litrlik yelim idishga joylangan umumiy qiymati 10 million 800 ming so‘mlik neft mahsuloti borligi aniqlangan.
Hozirda yuqoridagi holat yuzasidan bojxona organlari tomonidan surishtiruv harakatlari davom ettirilmoqda.
Izoh (0)