Doha shahriga amaliy tashrif bilan borgan O‘zbekiston tashqi ishlar vaziri Abdulaziz Komilov Qatar amiri Shayx Tamim bin Hamad al-Soniy tomonidan qabul qilindi, deb xabar beradi O‘zA.
Ma’lum qilinishicha, Abdulaziz Komilov Prezident Shavkat Mirziyoyevning Qatar amiri shayx Tamim bin Hamad al-Soniyga yo‘llagan maktubini yetkazgan.
Suhbat davomida O‘zbekiston—Qatar munosabatining hozirgi holati va rivojlanish istiqboli muhokama qilingan, xalqaro va mintaqaviy tashkilotlar doirasidagi sheriklikning dolzarb jihatlari to‘g‘risida fikr almashilgan. O‘zbekiston va Qatar ko‘p qirrali hamkorlikni yanada rivojlantirish uchun muhim salohiyatga ega ekani ta’kidlangan.
Tomonlar o‘zaro siyosiy muloqotni faollashtirish, shuningdek, savdo-iqtisodiy va investitsiyaviy sohalarda aloqani sezilarli darajada mustahkamlash zarurligini e’tirof etgan. Afg‘onistonda uzoq muddatli tinchlikka erishish va xavfsizlikni ta’minlash bo‘yicha afg‘onlararo inklyuziv muzokaralarni ilgari surish muhimligi ta’kidlangan.
Ta’kidlanishicha, Qatar tomoni O‘zbekistonning Afg‘onistondagi tinchlik jarayonini qo‘llab-quvvatlash borasidagi sa’y-harakatini yuqori baholagan. Muzokarada ikki tomon kun tartibidagi boshqa masalalar ham ko‘rib chiqilgani aytilmoqda.
Avvalroq Abdulaziz Komilov Dohada “Tolibon” harakatining siyosiy vakolatxonasi rahbari bilan uchrashgani to‘g‘risida xabar berilgandi.
Izoh (0)