КХДР ҳукумати масофавий таълим дастурини амалга ошириш комиссияси раисини ушбу органнинг самарасиз фаолияти сабабли қатл этди. Бу ҳақда Жанубий Кореянинг DailyNK нашри мамлакатдаги ўз манбасига таяниб, 10 апрель куни хабар берди.
Пхеняннинг расмий версиясига кўра, тузилма 2020 йилда ташкил этилганидан буён бирорта натижага эриша олмаган. Бироқ Жанубий Корея нашри қайд этишича, масофавий таълим дастурига раҳбарлик қилган Пак фамилияли мансабдор бошқа баъзи ходимлар билан бирга ҳукумат сиёсатини танқид қилиш билан шуғулланган. У, гўёки, ўз олдига қўйилган мақсадларни амалга ошириш учун талаб этилувчи ускуналар ва бинолар етишмаслиги ҳақида бир неча марта айтган.
Хабарларга кўра, Пак бир неча марта вазиятни ўзгартиришни таклиф қилган, ўз норозилигини билдирган ва комиссиянинг бошқа ишчиларидан мажлисларга расмий муносабатда бўлишни сўраган.
Сўнг комиссия аъзоларидан бири, Ким Ир Сен номидаги университетнинг юридик факультети декани ОТМ президенти ва олий таълим вазири билан учрашган ва улар билан масофавий таълимга алоқадор вазиятни муҳокама қилган.
Нашр маълумотларига қараганда, декан бу соҳада ҳамма нарса ҳам «мақсадга мувофиқ амалга оширилмаётгани»ни айтган ва Пак фаолиятидаги муайян тафсилотлар ҳақида гапириб берган, бу ҳақда партия марказий қўмитасидагилар хабар топган. Ташкилот департаменти ва марказий қўмита тузилмасидаги раҳбарият шундан кейин комиссияга нисбатан суриштирув бошлаган.
Март ойининг иккинчи ҳафтасида Пак «таълим соҳасида партияга қарши ва инқилобга қарши тариқатчилик фаолиятини олиб боргани учун» деган расмий сабаб билан қатл этилган.
2020 йил ноябрь ойида Шимолий Кореяда камида икки нафар амалдор COVID-19 коронавирус пандемияси сабаб юзага келган иқтисодий танглик туфайли қатл қилингани, декабрда эса одамларни қўрқитиш ва уларни COVID-19 сабабли карантинга қатъий амал қилишга мажбурлаш мақсадида бир эркак «фавқулодда карантин чораларини» бузганлиги сабабли омма олдида қатл этилгани хабар берилган эди.
Изоҳ (0)