O‘zbekistonda 2021-yil uchun zakot, fitr sadaqa va fidya miqdori e’lon qilindi

O‘zbekiston musulmonlari idorasi Fatvo hay’atining 2021-yilgi zakot nisobi, fitr sadaqa va fidya miqdori bo‘yicha qarori e’lon qilindi.

Fatvo hay’ati 1 gramm tillaning bugungi kundagi o‘rtacha narxi 320 000 (uch yuz yigirma ming) so‘m ekanini e’tiborga olib, 2021-yil uchun zakot nisobini (85 gramm tilladan) 27 200 000 (yigirma yetti million ikki yuz ming) so‘m deb belgiladi. Mazkur qiymatning qirqdan biri (1/40), ya’ni zakot uchun chiqariladigan qismi 680 000 (olti yuz sakson ming) so‘mga teng bo‘ladi.

“Shunga ko‘ra, zarur ehtiyojdan tashqari bir yil davomida 27 200 000 so‘m va undan ortiq mablag‘ga ega bo‘lgan musulmon kishi jami mablag‘ining qirqdan birini hisoblab, uni zakot niyatida kambag‘al va faqirlarga beradi”, — deyiladi qarorda.

Shuningdek, fitr sadaqasining miqdori bug‘doydan yarim so’ (2 kilogramm), arpadan bir so’ (4 kilogramm), mayizdan yarim so’ (2 kilogramm) va xurmodan bir so’ (4 kilogramm) ekanligi ta’kidlanib, bugungi kunda mazkur mahsulotlarning Toshkent shahar bozorlaridagi narxlari o‘rganilganda 1 kilogramm bug‘doy o‘rtacha 5 ming so‘m, 1 kilogramm arpa o‘rtacha 3,5 ming so‘m, 1 kilogramm mayiz o‘rtacha 40 ming so‘m va 1 kilogramm xurmo o‘rtacha 35 ming so‘m ekani ma’lum qilindi.

Shunga ko‘ra, fitr sadaqasining miqdori:

• bug‘doydan 2 kilogramm 10 000 (o‘n ming) so‘m;
• arpadan 4 kilogramm 14 000 (o‘n to‘rt ming) so‘m;
• mayizdan 2 kilogramm 80 000 (sakson ming) so‘m;
• xurmodan 4 kilogramm 140 000 (bir yuz qirq ming) so‘m deb belgilandi.

Fidya miqdori bir miskinning bir kunlik oziq-ovqati qiymatida bo‘lib, bugungi kunda bu o‘rtacha 25 000 (yigirma besh ming) so‘mga to‘g‘ri kelganidan, bu yilgi fidya miqdori bir kun uchun 25 000 (yigirma besh ming) so‘m, bir oyga 750 000 (yetti yuz ellik ming) so‘m deb belgilandi.

Ta’kidlanishicha, mazkur qiymatlar Toshkent shahar bozorlaridagi narxga asosan belgilangan bo‘lib, har bir viloyat o‘z bozorlaridagi narxga qarab fitr sadaqasini belgilaydi.

Eslatib o‘tamiz, O‘zbekistonda Ramazon oyining boshlanishi 13-aprel etib belgilandi. Ramazon oyida O‘zbekistondagi 1400 ga yaqin masjidda Qur’oni karim xatm qilinishi ma’lum qilingan. Masjidlarda taroveh namozlariga qulay shart-sharoitlarni yaratish maqsadida 10-aprel kuni “Ozodalik kuni” o‘tkaziladi.