Ўзбекистон Энергетика вазирлиги ва Phanes Group халқаро компанияси ўртасида Навоий вилояти Нурота тумани ҳудудида қуёш электр станцияси (ҚЭС) қуриш тўғрисида инвестиция шартномаси имзоланди. Бу ҳақда вазирлик матбуот хизмати хабар берди.
Маълум қилинишича, тадбир давомида Phanes Group ва «Ўзбекистон миллий электр тармоқлари» АЖ ўртасида электр энергиясини сотиб олиш тўғрисида битим ҳам имзоланган.
Phanes Group ва Ўзбекистон ҳукумати ўртасида ҚЭС (IА) ва электр энергиясини сотиб олиш тўғрисидаги битим (PPА) 200 мегаватт қувватга эга бўлган қуёш фотоэлектр станциясини қуриш, эгалик қилиш ва эксплуатация қилиш учун техник ва тижорий шартларни, шунингдек, 60 километр узунликдаги 220/110 киловатт нимстанцияни ўз ичига олади.
Маълумот учун, Phanes Group бош офиси БААнинг Дубай шаҳрида жойлашган бўлиб, у қуёш энергияси, шунингдек, инвестиция ва активларни бошқариш соҳасида лойиҳалар ишлаб чиқиш ва амалга ошириш билан шуғулланувчи халқаро компания ҳисобланади. Phanes Group 2012 йилда ташкил этилган. Компания молиявий ва муҳандислик тажрибасини бирлаштирадиган кенг қамровли ёндашувни амалга оширади. Бунинг натижасида, компания қуёш энергияси соҳасида тўлиқ тайёр ечимларни таклиф қилади.
Phanes Group қуёш энергияси соҳасида сармоялар портфелига эга ва унинг географияси кўплаб мамлакатларни қамраб олади. Компания ривожланаётган бозорларга, айниқса Африка, Яқин Шарқ, Марказий Осиё ва Мустақил Давлатлар Ҳамдўстлиги (МДҲ) мамлакатларига алоҳида эътибор қаратмоқда.
Бугунги кунга қадар компаниянинг экологик тоза энергия бўйича ҳиссаси 130 мегаваттдан ошади. Бундан ташқари, яна 3,5 гигаватт ривожланиш ёки режалаштириш босқичида, шу жумладан, Марказий Осиё ва МДҲ мамлакатларида 922 мегаватт лойиҳалар портфелида.
Эслатиб ўтамиз, январь ўрталарида Masdar компанияси Навоийда қуёш фотоэлектр станцияси қуришни бошлагани тўғрисида хабар берилганди.
Изоҳ (0)