Aktyor va boshlovchi Samandar Hamroqulov MY5 telekanalining “Omon-omon” ko‘rsatuvida mehmon bo‘ldi hamda “Muhabbat sinovlari” filmi haqidagi avval e’lon qilinmagan ma’lumotlarni so‘zlab berdi.
“Rustam Sa’diyev talabalik paytlarimizda Yulduz Usmonovaning ‘Muhabbatjon’ qo‘shig‘iga klip suratga olmoqchi bo‘lib, institutga keldilar. Bosh rollarga meni, Ilmira Rahimjonova va Dilshodbek Kattabekovni tanlab oldilar. Ssenariy tayyor bo‘lganidan keyin Yulduz Usmonovaga ko‘rsatishga olib bordik. Ssenariyni o‘qigan Yulduz Usmonova ‘Rustam buni kino qilib qo‘yibsiz-ku! Siz buni kino qilib oling’, dedilar. Rustam aka ‘Men hech qachon kino olmaganman-ku’, dedilar. ‘Rustam qachongacha klip ishlab yurasiz, kino ham oling, harakat qiling’, dedilar Yulduz opa. Shu bilan ‘Muhabbatjon’ klipiga yozilgan ssenariy asosida ‘Muhabbat sinoblari’ filmi suratga olindi”, — deydi Samandar.
Shuningdek, Samandar filmdagi partnyori Lobar Polvonovaning hozir qayerda ekanligi haqidagi savolga ham javob berdi.
“Lobarxon turmushga chiqib, farzandli bo‘lganlar. Hozir nima ish qilayotganlarini bilmayman. O‘zi hayotda ham dizayner. Oxirgi marta ko‘rganimda Alisher Navoiy nomidagi opera va balet teatriga kostyumlar tikayotgandi. Anchadan beri ko‘rmaganim uchun hech qanaqa ma’lumotga ega emasman. Film suratga olinganidan beri ko‘rmagandim, o‘sha kuni ko‘rib qoldim”, — deydi Samandar.
Ma’lumot uchun, “Muhabbat sinovlari” filmi 2003-yilda suratga olingan va tomoshabinlar e’tiborini qozongan. Filmda bosh rollarni Samandar, Lobar Polvonova, Mirza Azizov, Abdurayim Abduvahobov, Zuhra Ashurova, Mirzabek Xolmedov, Dilshodbek Kattabekov, Shuhrat Nuraliyev, Manzura va boshqa taniqli aktyorlar ijro etgan.
Izoh (0)