Eron Islom respublikasidan tashqarida faoliyat yuritayotgan muxolifat vakili 6-aprel kuni Venada Eron tashqi ishlar vazirining o‘rinbosari Abbos Aragchiga hujum qilishga urindi. Bu haqda “TASS” agentligi xabar berdi.
Ta’kidlanishicha, Aragchi Yevropa Ittifoqi tashqi xizmati bosh kotibi Enrike Mor bilan muzokaralar o‘tkazgan. Shundan so‘ng Eron muxolifatining vakili diplomatni haqoratlab, unga hujum qilmoqchi bo‘lgan. Hujumning oldi olingan.
Agentlikning xabar berishicha, 6-aprel kuni Eronning uyushmagan muxolifati vakillari Vena shahridagi mehmonxona yonida to‘plangan, u yerda yadro sohasidagi Qo‘shma harakatlar rejasi (JCPOA) bo‘yicha Qo‘shma Komissiya yig‘ilishi bo‘lib o‘tishi kerak edi.
Muxolifat vakillari yadroviy bitim muzokaralariga qarshi norozilik bildirmoqda. Eronning Venadagi elchixonasi mahalliy hokimiyatni Eron delegatsiyasi xavfsizligini ta’minlashga chaqirdi.
Vena politsiyasi Aragchiga hujum qilinganligi to‘g‘risida ma’lumot kelib tushmaganini aytdi. “Bizda bunday ma’lumot yo‘q”, — dedi politsiya Eron OAV xabarlariga javoban.
2021-yildagi birinchi Eron va xalqaro “beshlik” (Rossiya, Buyuk Britaniya, Germaniya, Xitoy va Fransiya) qo‘shma komissiyasining yig‘ilishi 6-aprel kuni Venada bo‘lib o‘tadi. Siyosiy rahbarlar darajasidagi uchrashuv ishtirokchilari Eron yadroviy kelishuvini to‘liq bajarilishini tiklash masalalarini muhokama qiladi va ikki ekspert guruhi tomonidan ko‘rib chiqiladigan vazifalarni belgilaydi. Venadagi yig‘ilishda Eron delegatsiyasiga Aragchi boshchilik qiladi.
Avvalroq Eron yadroviy kelishuviga a’zo davlatlar AQShning ushbu bitimga qaytishiga yordam bermoqchiligini ma’lum qilgan edi. Eron AQShning Tehronga qarshi sanksiyalari bekor qilinmaguncha uranni boyitish darajasini 20 foizdan tushirmasligini aytgan.
Izoh (0)