Jahon sog‘liqni saqlash tashkiloti (JSST) ma’lumotlariga ko‘ra, dunyoda koronavirusga chalinganlar soni 131 million kishidan oshdi, shularning 2,85 millioni vafot etdi. Jons Hopkins universiteti ma’lumotlari bo‘yicha esa, butun dunyoda koronavirus bilan kasallanganlar soni 131,8 million kishidan oshgan, 2,86 milliondan ziyodi vafot etgan.
Virusni yuqtirganlar soni bo‘yicha AQSh yetakchi bo‘lib qolmoqda, u yerda 30,7 million kishida virus aniqlangan. Braziliya ikkinchi (13 million), Hindiston uchinchi (12,6 million) o‘rinda bormoqda. Fransiya (4,8 million), Rossiya (4,5 million) va Buyuk Britaniya (4,3 million) tegishli ravishda to‘rtinchi, beshinchi va oltinchi o‘rinlarni egalladi.
Dunyoda asosiy vaksina ishlab chiqaruvchilari va xaridorlari kimlar?
AQShning Dyuk universiteti mutaxassislari hisob-kitoblariga ko‘ra, dunyo mamlakatlari COVID-19’ga qarshi jami 8,6 milliard doza vaksina yetkazib berish bo‘yicha shartnomalar tuzgan. Ular orasida eng ommabopi — AstraZeneca kompaniyasi vaksinasi bo‘lib, butun dunyoda 2,4 milliard dozada oldindan buyurtma qilingan. Ikkinchi o‘rinda — 1,5 milliard doza ko‘rsatkich bilan Pfizer vaksinasi. Ekspertlar hisob-kitoblari bo‘yicha, Rossiyaning “Sputnik V” vaksinasi bozorga 303 million, Xitoyning Sinovac vaksinasi esa 480 million dozada yetkazib beriladi.Bundan tashqari, jami vaksinalarning 4,6 milliard dozasi yoki 53 foizi yuqori daromadli mamlakatlar (Jahon banki klassifikatsiyasi bo‘yicha, YaIM aholi boshiga 12,5 ming dollardan ko‘p bo‘lgan mamlakatlar kiradi, masalan, AQSh, Yevroittifoq, Buyuk Britaniya, Gonkong). Vaksina xaridlarining 17 foizi o‘rtachadan yuqori daromadli mamlakatlar (YaIM aholi boshiga 4—12 ming dollar — Xitoy, Braziliya, Belarus), 16 foizi esa o‘rtachadan past daromadli mamlakatlarga (1—4 ming dollar — Indoneziya, Nepal va boshqalar) to‘g‘ri keladi. Qolgan ulushi esa COVAX mexanizmi orqali vaksina xaridlariga tegishlidir.
2021-yilda jami 12 milliard doza vaksina ishlab chiqarilishi kutilmoqda. Hozircha faqat 8,6 milliard doza uchun shartnomalar tuzilgan. Eng ko‘p vaksina Yevroittifoq (1,8 milliard doza), AQSh (1,2 milliard), Afrika ittifoqi (680 million doza), Buyuk Britaniya (457 million) va Braziliya (370 million) buyurtma qilgan.
Mavzuga doir: “Boy davlatlar koronavirusga qarshi vaksinalarning 60 foizini sotib olgan” — Xitoy tashqi ishlar vaziri
AQShda koronavirusning qo‘shmutatsiyali “hindcha” shtammi aniqlandi
AQShda koronavirusning dastlab Hindistonda aniqlangan qo‘shaloq mutatsiyali yangi shtammini yuqtirib olish bilan bog‘liq birinchi holat aniqlandi. Bu haqda Stenford klinik virusologiya laboratoriyasi mutaxassislari ma’lum qildi. Yangi shtamm San-Fransisko ko‘rfazi hududida yashaydigan fuqaroda qayd etilgan. Koronavirusning “hindcha” shtammiga chalinishda gumon qilinayotgan yana yetti kishi tekshirilmoqda.Hindistonda koronavirusning ikki marta mutatsiyaga uchragan yangi shtammi aniqlangani haqida mart oxirida ma’lum bo‘lgan edi.
Hindiston poytaxtida komendantlik soati joriy qilindi
Hindiston poytaxti Nyu-Delida koronavirus bilan kasallanish darajasining o‘sishiga qarshi kurashish uchun tungi komendantlik soati joriy qilindi. U har kuni 22:00 dan 5:00 gacha amal qiladi. Bu vaqt oralig‘ida restoranlar va pablar ishlamaydi, to‘ylar va boshqa ommaviy tadbirlar o‘tkazilmaydi.Tungi vaqtda faqat yashash uchun muhim mahsulotlar bilan savdo qiluvchi do‘konlar va dorixonalar ishlashi mumkin. Ikki kishidan ko‘p odamning guruh bo‘lib to‘planishi taqiqlanadi.
Hindistonda 4-aprel kuni COVID-19 yuqtirish bo‘yicha 103 mingdan ortiq yangi holat qayd etildi. Ta’kidlanishicha, sutkalik yuqtirishning bu qadar yuqori ko‘rsatkichi 2020-yilning sentabridan beri birinchi marta kuzatilmoqda.
Mavzuga doir: Janubiy Koreyada koronavirusning to‘rtinchi to‘lqini kutilmoqda, Hindistonda va Xitoyda kasallanish rekord darajada o‘sdi
- Buyuk Britaniya bosh vaziri Boris Jonson 17-maydan keyin xalqaro sayohatlar tiklanishiga umid bildirdi. Shu bilan birga, u COVID-19’ning mamlakat hududiga olib kirilishi bilan bog‘liq xavflarni ham eslatdi. Bundan tashqari, bosh vazir boshqa mamlakatlar xalqaro safarlar sohasida COVID-pasportlar joriy qilayotganini va Britaniya ham “buni hal qilishi” kerakligini aytdi.
- Gruziya bosh vaziri Irakliy Garibashvilida koronavirus aniqlandi. Mamlakat hukumati taqdim etgan xabarga ko‘ra, bosh vazir o‘zini yaxshi his qilmoqda va yakkalanish rejimida masofadan ishlamoqda.
Izoh (0)