Qozog‘istonda aholini koronavirusga qarshi emlash sentabrda yakunlanishi rejalashtirilmoqda

Qozog‘istonda 2021-yil sentabr oyiga kelib koronavirusga qarshi vaksinaga muhtoj 10 million kishini emlash rejalashtirilgan. Bu haqda mamlakat bosh vaziri Asqar Maminga tayanib, Tengrinews xabar berdi.

Bosh vazirning ta’kidlashicha, aprel, may va iyun oylarida, har oyda 2 milliondan jami 6 million kishi koronavirusga qarshi vaksina oladi.

“Sentabr oyida biz vaksinaga muhtoj bo‘lgan 10 million kishini emlab bo‘lishni rejalashtirmoqdamiz. Shundan so‘ng orttiriladigan jamoaviy immunitet ta’sirini kutamiz”, — dedi Mamin hukumat yig‘ilishida.

“Shu bilan birga, ayrim sohalarda vaksinatsiya ishlarini kuchaytirish zarur. Sog‘liqni saqlash vazirligi va hokimiyatlarga emlanganlar sonini ko‘paytirish va hududlarga belgilangan rejaga muvofiq vaksinalar yetkazib berishni ta’minlash bo‘yicha choralar ko‘rishni topshiraman. Axborot va ijtimoiy taraqqiyot vazirligi mediarejani yangilab, Sog‘liqni saqlash vazirligi hokimiyatlar bilan birgalikda emlashning ahamiyati to‘g‘risida jamoatchilikka keng ko‘lamli ma’lumot va tushuntirish ishlarini olib borishi lozim”, — deya ko‘rsatmalar berdi bosh vazir.

Sog‘liqni saqlash vaziri Aleksey Soy aprel oyida mamlakat hududlariga koronavirusga qarshi vaksinalar yetkazib berishning  ko‘paytirilishi haqida ma’lum qilgan edi.

Avvalroq Qozog‘istonda maktab o‘quvchilari orasida koronavirusga chalinish darajasi mart oyida 5 foizga oshgani haqida xabar berilgandi.

Shuningdek, Qozog‘iston poytaxti Nur-Sultonda koronavirus bilan kasallanish holatlari ortgani sababli 30-martdan yangi karantin cheklovlari amal qilishni boshladi. Boshqa chora-tadbirlar bilan bir qatorda, poytaxtdagi maktab bitiruvchilaridan tashqari boshqa o‘quvchilar va oliy o‘quv yurtlari talabalari masofaviy ta’limga o‘tkazildi.