Gruziya bosh vaziri Irakli Garibashvilining COVID-19’ga topshirgan testi musbat natija berib, unda koronavirus mavjudligi tasdiqlandi. Bu haqda hukumat ma’muriyatiga tayanib, “Interfaks” xabar berdi.
Xabarda aytilishicha, bosh vazir o‘zini yaxshi his qilmoqda. Garibashvili o‘zini yakkalash tartibiga olgan holda, masofadan turib ishlashda davom etmoqda.
Gruziya Sog‘liqni saqlash vazirligining ma’lumotlariga ko‘ra, 5-aprel kuni mamlakatda o‘tkazilgan 24 592 ta COVID-19 testidan so‘ng 897 kishida infeksiya mavjudligi aniqlandi, 10 kishi kasallikdan vafot etdi.
Avvalroq Argentina prezidenti Alberto Fernandesning koronavirusga topshirgan testi musbat natija bergani haqida xabar berilgandi. Yanvar oyida Argentina prezidenti “Sputnik V” bilan emlangan edi. Rossiya prezidenti Vladimir Putin koronavirus bilan kasallangan Argentina rahbariga qo‘ng‘iroq qilib, hol-ahvol so‘radi. Suhbat davomida Argentina prezidenti koronavirusga qarshi Rossiyaning “Sputnik V” vaksinasi bilan emlangani sababli kasallik simptomlarsiz kechayotganini ta’kidlab o‘tdi.
Undan avval Portugaliya prezidenti Marselu Rebelu di Sozaning koronavirus infeksiyasiga topshirgan testi musbat natija ko‘rsatgani haqida xabar berilgandi. Shuningdek, Armaniston prezidenti Armen Sarkisyan oilasi bilan Yangi yil ta’tilini o‘tkazish paytida London shahrida koronavirus yuqtirib olgan. Prezident matbuot xizmati unda kasallik og‘ir kechganini ma’lum qilgan.
Bundan tashqari, Braziliya vitse-prezidenti, Fransiya prezidenti Emmanuel Makron, Shvetsiya shahzodasi Karl Filipp va malika Sofiyada hamda Ukraina prezidenti Vladimir Zelenskiyda koronavirus aniqlangan.
Izoh (0)