Iqtisodiyot bo‘yicha 1999-yilgi Nobel mukofoti laureati, kanadalik olim Robert Mandell 88 yoshida Italiyada vafot etdi. Bu haqda mahalliy Adnkronos axborot agentligiga tayanib, “RIA Novosti” xabar berdi.
Mandell uzoq davon etgan kasallikdan so‘ng, 4-aprel kuni tongda Toskanadagi (Italiyaning markaziy qismida joylashgan hudud) shifoxonada vafot etdi. U so‘nggi o‘ttiz yil davomida Siyena provinsiyasi (Toskana hududida joylashgan) va Nyu-Yorkda navbatma-navbat yashab kelayotgan edi, deb yozadi agentlik.
Robert Mandell yevro g‘oyasiga turtki bergan shaxs sifatida tanilgan. 60-yillarning boshida u optimal valyuta zonalari nazariyasi (pul siyosatining umumiy maqsadlariga bir nechta hududlar orqali iloji boricha kam xarajat yoki zarar bilan erishish mumkin bo‘lgan sohalar) hammualliflaridan biri bo‘ldi.
Mandell bir nechta universitetlarda dars berdi, lekin faoliyatining asosiy qismini Nyu-Yorkning Kolumbiya universitetiga bag‘ishladi. 70-yillarda u hozirgi Yevropa Ittifoqining prototipi bo‘lgan Iqtisodiyot va valyuta kengashining moliya qo‘mitasida ishlagan. 1999-yilda “Turli xil valyuta kurslari rejimlari doirasida pul va soliq siyosatining tahlili, shuningdek, optimal valyuta zonalarining tahlili uchun” iqtisodchi Nobel mukofoti bilan taqdirlangan. Mandellning tadqiqotlari yevroning asosini yaratishda yordam bergan.
Avvalroq Birlashgan Arab Amirliklarida Dubay moliya vaziri, Dubay amiri Muhammad ibn Rashid al-Maktumning akasi Hamdan ibn Rashid al-Maktum vafot etgani haqida ma’lumot berilgandi. 2020-yilning oktabr oyida 75 yoshli Hamdan al-Maktum chet elda operatsiya qilingan edi. Mart oyining boshida reabilitatsiya kurslaridan keyin u Dubayga qaytgan. Operatsiya tafsilotlari va u amalga oshirilgan joy haqida ma’lumot berilmagan.
Shuningdek, audiokasseta uchun tasma va kompakt-diskni ixtiro qilgan gollandiyalik muhandis Lu Ottens 94 yoshida Niderlandiyada vafot etgani haqida xabar berilgandi.
Izoh (0)