Иқтисодиёт бўйича 1999 йилги Нобель мукофоти лауреати, канадалик олим Роберт Манделл 88 ёшида Италияда вафот этди. Бу ҳақда маҳаллий Adnkronos ахборот агентлигига таяниб, «РИА Новости» хабар берди.
Манделл узоқ давон этган касалликдан сўнг, 4 апрель куни тонгда Тосканадаги (Италиянинг марказий қисмида жойлашган ҳудуд) шифохонада вафот этди. У сўнгги ўттиз йил давомида Сиена провинцияси (Тоскана ҳудудида жойлашган) ва Нью-Йоркда навбатма-навбат яшаб келаётган эди, деб ёзади агентлик.
Роберт Манделл евро ғоясига туртки берган шахс сифатида танилган. 60 йилларнинг бошида у оптимал валюта зоналари назарияси (пул сиёсатининг умумий мақсадларига бир нечта ҳудудлар орқали иложи борича кам харажат ёки зарар билан эришиш мумкин бўлган соҳалар) ҳаммуаллифларидан бири бўлди.
Манделл бир нечта университетларда дарс берди, лекин фаолиятининг асосий қисмини Нью-Йоркнинг Колумбия университетига бағишлади. 70 йилларда у ҳозирги Европа Иттифоқининг прототипи бўлган Иқтисодиёт ва валюта кенгашининг молия қўмитасида ишлаган. 1999 йилда «Турли хил валюта курслари режимлари доирасида пул ва солиқ сиёсатининг таҳлили, шунингдек, оптимал валюта зоналарининг таҳлили учун» иқтисодчи Нобель мукофоти билан тақдирланган. Манделлнинг тадқиқотлари евронинг асосини яратишда ёрдам берган.
Аввалроқ Бирлашган Араб Амирликларида Дубай молия вазири, Дубай амири Муҳаммад ибн Рашид ал-Мактумнинг акаси Ҳамдан ибн Рашид ал-Мактум вафот этгани ҳақида маълумот берилганди. 2020 йилнинг октябрь ойида 75 ёшли Ҳамдан ал-Мактум чет элда операция қилинган эди. Март ойининг бошида реабилитация курсларидан кейин у Дубайга қайтган. Операция тафсилотлари ва у амалга оширилган жой ҳақида маълумот берилмаган.
Шунингдек, аудиокассета учун тасма ва компакт-дискни ихтиро қилган голландиялик муҳандис Лу Оттенс 94 ёшида Нидерландияда вафот этгани ҳақида хабар берилганди.
Изоҳ (0)