Namanganda maxsus bog‘cha tarbiyalanuvchisining kuyish oqibatidagi o‘limi munosabati bilan jinoyat ishi qo‘zg‘atildi. Bu haqda “Daryo” muxbiri Azizbek Abduvaliyev xabar bermoqda.
Viloyat maktabgacha ta’lim boshqarmasi axborot xizmatiga ko‘ra, 2015-yilda tug‘ilgan Ulug‘bek Hoshimov 2019-yil 27-fevraldan Namangan shahrining Davlatobod tumanidagi 31-sonli maxsus davlat maktabgacha ta’lim tashkilotida aqliy rivojlanishdan orqada qolish tashxisi bilan tarbiyalanib kelgan.
2021-yil 5-fevral kuni bola tarbiyalanuvchilar xavfsizligi uchun mas’ul tarbiyachi va yordamchi tarbiyachi xodimlarning beparvoligi tufayli issiq suv tarmog‘i jo‘mragini ochib yuborib, ikkinchi darajali kuyish tan jarohatini olgan.
Voqea sodir bo‘lgandan so‘ng bolaga bog‘chaning shifokor, hamshira va boshqa xodimlari tomonidan birinchi tibbiy yordam ko‘rsatilgan. Tez yordam mashinasida viloyat ko‘p tarmoqli bolalar shifoxonasiga yetkazilgan.
“Viloyat Maktabgacha ta’lim boshqarmasi voqea kunining o‘zida xizmat tekshiruvi o‘tkazgan. Ishchi guruh tomonidan tuzilgan dalolatnomada mazkur hodisa mas’ul xodimlarning xizmat vazifasiga sovuqqonligi, beparvoligi tufayli sodir bo‘lganligi qayd etilgan va bog‘chaning 3 nafar xodimi vazifasidan ozod etilgan. Voqea yuzasidan o‘tkazilgan xizmat tekshiruvi xulosasi Davlatobod tuman prokuraturasiga yuborilgan”, — deydi boshqarma axborot xizmati rahbari Saidolim Abdurahmonov.
Ulug‘bek Hoshimov ko‘rsatilgan tibbiy muolajalarga qaramay 2021-yil 24-fevral kuni vafot etgan. Namangan viloyat sud-tibbiy ekspertiza byurosi tomonidan shu kuni berilgan xulosada qaynoq suvdan bosh, yuz va tana boshqa qismlarining 2-, 3-darajali 70 foiz kuyishi oqibatida poliorgan yurak-qon tomir yetishmovchiligi o‘limga olib kelganligi va jasadda kuyishdan boshqa tan jarohatlari aniqlanmaganligi ko‘rsatilgan.
“Mazkur holatga tergov yo‘li bilan baho berish zaruriyati tug‘ilganligi sababli 2021-yil 4-aprel kuni Jinoyat kodeksining 116-moddasi 3-qismi, 207-moddasi 1-qismi bilan jinoyat ishi qo‘zg‘atildi. Hozirda viloyat prokuraturasi tomonidan tergov harakatlari olib borilmoqda”, — deydi Namangan viloyat prokuraturasi mas’ul xodimi Rustamjon Jalolov.
Mutasaddilarning bildirishicha, tergov natijalari haqida qo‘shimcha ma’lum qilinadi.
Izoh (0)