Kubaning Guantanamo prefekurasida joylashgan harbiy bazadagi qamoqxonaning eng maxfiy bo‘limi hisoblanadigan 7-lagerdagi barcha mahbuslar boshqa bo‘limga o‘tkazildi. Bu haqda AQSh janubiy qo‘mondonligi saytiga tayanib, “RBK” xabar berdi.
Associated Press ma’lumotlariga ko‘ra, 7-lager 2006-yilda tashkil etilgan bo‘lib, unda eng xavfli mahbuslar saqlangan. Xususan, lagerdagi mahbuslarga “so‘roq qilishning o‘ta og‘ir usullari” qo‘llanilgani haqida aytib o‘tilgan. Uzoq vaqt davomida harbiylar Guantanamo qamoqxonasida 7-lager mavjudligini inkor qilib kelgan.
Janubiy qo‘mondonlikning so‘zlariga ko‘ra, qamoqxona ma’murlari “barcha mahbuslarni xavfsiz va bexavotir holda 7-lagerdan 5-lagerga ko‘chirib o‘tkazgan”. Shunday qilib, Guantanamodagi barcha 40 mahbus endi uchta emas, ikkita bo‘limda saqlanadi, bu esa “qamoqxona xarajatlarini” kamaytiradi.
Bayonotda aytilishicha, mazkur o‘zgarish “kuchlarning himoyasi va xavfsizligiga tahdid solmaydi yoki mahkumlarga nisbatan xavfsiz, qonuniy va insonparvar munosabatlarni ta’minlash vazifasini buzmaydi”.
2021-yilning fevral oyida Oq uy matbuot kotibi Jen Psaki AQSh prezidenti Jo Bayden ma’muriyati Guantanamo qamoqxonasini yopmoqchi ekanini e’lon qildi. Reuters xabariga ko‘ra, yaqin haftalar yoki oylarda Bayden qamoqxona taqdirini qayta belgilaydigan hujjatni imzolaydi.
Ma’lumot uchun, Guantanamo harbiy bazasidagi xalqaro terrorchilar jazoni o‘taydigan qamoqxona AQShning sobiq prezidenti Jorj Bush tomonidan 2001-yildagi 11-sentabr teraktlaridan so‘ng terrorizmda ayblangan jinoyatchilarni jazoga mahkum qilish uchun 2002-yil ochilgan. 2003-yilda Guantanamodagi qamoqxonada deyarli 700 nafar mahbus saqlangan.
Sobiq prezident Barak Obamaning 2008-yildagi birinchi saylov kampaniyasidagi asosiy saylovoldi va’dalaridan biri mazkur qamoqxonani yopish bo‘lgandi. Keyinchalik Obamaning taklifi Kongress tomonidan ma’qullanmagan. Obamaning so‘zlariga ko‘ra, 2016-yilda qamoqxona uchun 445 million dollar sarflangan, sobiq prezident buni pulni behuda isrof qilish deb atagan.
Donald Tramp ushbu qamoqxonadagi mahbuslarni o‘ta xavfli deb atagan va 2018-yilning yanvarida qamoqxonani saqlab qolish haqida farmon imzolagan. BMT ma’lumotiga ko‘ra, hozir Guantanamoda 40 nafar mahbus bor, ulardan faqat to‘qqiz nafariga ayblov e’lon qilingan yoki hukm chiqarilgan. Huquq himoyachilari ushbu obyektni yopishni talab qilmoqda.
Izoh (0)