O‘zbekistonning Qanot Sharq Airlines xususiy aviakompaniyasi ikkita Airbus A320-214 aviaoperatorini ro‘yxatdan o‘tkazdi, deb xabar beradi Telegram’dagi AviaSpotter kanali.
“Qanot Sharq ikkita Airbus A320-214 aviaoperatorini O‘zbekistonda UK32030 va UK32031 raqamlari ostida ro‘yxatdan o‘tkazdi va yaqin orada ular O‘zbekistonga yetkaziladi”, — deyiladi xabarda.
Eslatib o‘tamiz, 2019-yilning sentabrida Qanot Sharq Airlines xususiy kompaniyasi Superjet samolyotlariga shartnoma (yetkazib berish haqidagi bitimni nazarda tutadi) imzolagani haqida xabar berilgan edi. Aviakompaniya, shuningdek, Rossiyaning Sukhoi Civil Aircraft Company (SСАC) kompaniyasidan uchta Superjet 100 samolyotini lizingga olishni rejalashtirgandi.
Mavzuga doir: O‘zbekistonning Qanot Sharq Airlines xususiy aviakompaniyasi Amerikaning ikkita Airbus A320-200 samolyotini ijaraga oldi
Ma’lumot uchun, Qanot Sharq Airlines 1998-yilda ro‘yxatga olingan hamda yuk va yo‘lovchi aviatashuvlariga ixtisoslashgan. 2003-yildan 2012-yilgacha kompaniya “O‘zbekiston havo yo‘llari” MAKdan Il-76 samolyotlarini ijaraga olgan va O‘zbekistondagi birinchi xususiy aviakompaniya o‘laroq o‘z charter reyslarini amalga oshirgan. Kompaniya 150 mingdan ortiq yo‘lovchi tashigan. Barcha Il-76 samolyotlari O‘zbekiston Mudofaa vazirligiga o‘tkazilgach, Qanot Sharq Airlines’ning ekspluatantlik sertifikati to‘xtatilgan.
Izoh (0)