Toshkent viloyati Quyi Chirchiq tumanida mast holda janjallashib, tanishiga tan jarohati yetkazgan shaxs qo‘lga olindi, deya xabar bermoqda Tergov departamenti.
Ma’lum qilinishicha, 2021-yilning 20-mart kuni soat 21:30 larda 26 yoshli M.B. mast holatda Quyi Chirchiq tumani “Ko‘ksaroy” MFY hududida 36 yoshli B.R. bilan o‘zaro janjallashib, bilyard tayog‘i bilan uning bosh qismiga urib jarohat yetkazgan.
Oqibatda B.R. bosh miya ochiq jarohati, bosh miya lat yeyishi kabi jarohatlar bilan shifoxonaga yotqizilgan.
Sud tibbiy ekspertiza xulosasida B.R. og‘ir turdagi tan jarohatlari olganligi ko‘rsatilgan.
Olib borilgan tergovga qadar tekshiruv harakatlari davomida M.B. va B.R. hech bir sababsiz janjallashib qolgani, ularning ikkalasi ham mast holatda bo‘lgani aniqlangan.
Mazkur holat yuzasidan Quyi Chirchiq tumani IIB huzuridagi tergov bo‘limi tomonidan M.B.ga nisbatan Jinoyat kodeksining 104-moddasi 2-qismi “e, l” bandlari (bezorilik oqibatida sovuq qurol sifatida foydalanilishi mumkin bo‘lgan ashyolarni ishlatib qasddan badanga og‘ir shikast yetkazish) bilan jinoyat ish qo‘zg‘atilib, protsessual tartibda ushlangan.
Hozirda tergov harakatlari olib borilmoqda.
Avvalroq Navoiyda chiqindi yig‘ish bilan shug‘ullanuvchi fuqaro sherigi tomonidan do‘pposlab o‘ldirilgani, Termizda er qizini ko‘rishga to‘sqinlik qilgani uchun xotiniga pichoq urgani hamda Samarqandda qizining sha’nini bulg‘ovchi gap-so‘zlarni tarqatgan erkakni kaltaklagan otaga nisbatan jinoyat ishi qo‘zg‘atilgani haqida xabar berilgandi.
Izoh (0)