Pekinda 24–31-mart kunlari onlayn tarzda bo‘lib o‘tgan moda haftaligi yakuniga yetdi. Zamonaviy va an’anaviy bichimdagi liboslarni o‘zida mujassam etgan tadbirdagi eng yaxshi suratlarni e’tiboringizga havola etamiz.
China Fashion Week’da 64 ta brend o‘zining kuzgi kolleksiyalarini taqdim qildi.
Moda haftaligi mojarosiz o‘tmagan. Dizayner Chjou Li kolleksiyasining taqdimotidan keyin podiumga paxtadan yasalgan guldasta bilan chiqib, bu mato uning uchun sevimli ekanligini bildirgan. G‘arb faollari Shinjon-Uyg‘ur muxtor hududida faoliyat yuritadigan ishlab chiqaruvchini uyg‘urlarni majburiy mehnatga jalb qilganlikda ayblagan. Oqibatda aksariyat Yevropa brendlari Xitoyda ishlab chiqariladigan mazkur matoni xarid qilishdan bosh tortgan. Bunga javoban xitoyliklar H&M, Nike va Adidas singari do‘konlarga boykot e’lon qilgan. Bu esa ushbu kompaniyalar Xitoydagi savdo do‘konlarini yopishiga olib kelgan.
2020-yil boshqa sohalar singari moda olamida ham katta o‘zgarishlar bo‘lgan va bu mavjud tendensiyalar yangilanishiga ta’sir etmay qolmagan. Oddiy libos ham qo‘l ishi bilan yaratilgandek tasavvur uyg‘otadigan an’anaviy texnikaga bo‘lgan talab esa yanada oshgan. Aslida, Xitoyda milliy uslubdagi ayollar liboslariga bo‘lgan qiziqish hamisha yuqori bo‘lgan. Bu nafaqat 1920-yillarda paydo bo‘lgan sipao, balki xanfaga ham tegishli.
Xitoy moda haftaligi doirasida Chuyan, Heaven Gaia, Grace Chen singari brendlar an’anaviy yo‘nalishdagi ijod namunalarini taqdim qilgan. Ulardan ayrimlari podiumda eski choy marosimlarini uyushtirgan bo‘lsa, ba’zilari Xan, Sun, Min sulolalari davriga mos makiyajda ko‘rinish bergan.
Moda bo‘yicha mutaxassis Li Diar uzoq vaqt ishlab chiqarishda g‘arbdan ilhom olingani, ammo endi bir necha ming yillardan buyon mavjud bo‘lgan moda o‘zlarida ham borligi haqida esga olish vaqti kelganini ta’kidlagan.
China Daily xitoylik dizaynerlar mazkur yilda o‘z ijod namunalari bilan G‘arbni zabt etganini ma’lum qilgan. Nashr Uma Wang, Dawei Studio, Mashama, Shiatzy Chen, Jarel Zhang, Calvin Luo, Maison Mai singari triumfatorlarni sanab o‘tgan. Moda haftaligida xitoyliklardan tashqari, Malayziya, Hindiston, Yaponiya, Avstraliya va Kanada, umuman olganda, 16 mamlakatdan dizaynerlar ishtirok etgan. Xitoy va Pokiston o‘rtasidagi diplomatik munosabatlar o‘rnatilganining 70 yilligi munosabati bilan tashkilotchilar ilk marta pokistonlik dizaynerlarni ham taklif etgan. Pokistondan Maheen Khan, Tabassum Mughal, Sadaf Malaterre, Diners va Gogi singari ishtirokchilar qatnashgan.
Janubiy Koreyaning dizaynerlari esa o‘z kolleksiyalarini raqamli platformada onlayn tarzda namoyish etgan. Tashkilotchilar Xitoyning qisqa video platformasi Douyin’s E-commerce bilan hamkorlik qilgan va so‘nggi feshn tendensiyalar nafaqat onlayn, balki oflayn taqdim qilingan. Dizaynerlar strim o‘tkazish imkoniyatidan mamnun bo‘lgan. “Bu mijozlar bilan to‘g‘ridan-to‘g‘ri muloqot qilish usuli”, – degan Chjao Xueychjou.
Odatda Pekinda bo‘lib o‘tadigan Shanxay moda haftaligi esa qoldirilgan. Martning so‘ngida bo‘lib o‘tishi kerak bo‘lgan tadbirni 6—13-aprel kunlari onlayn o‘tkazish rejalashtirilgan. Uni Xitoy ijtimoiy tarmoqda 5- milliondan ortiq kuzatuvchisi bor bloger Li Jiaqi (aka Austin Li) olib borishi rejalashtirilgan. Shanxayda shuningdek onlayn platforma ishlab chiqish ishlari allaqachon boshlab yuborilgan. Pekinda bo‘lib o‘tgan moda haftaligi doirasida yosh dizaynerlarning 29-xalqaro tanlovi bo‘lib o‘tgan. Unda dunyoning 30 mamlakatidan ishtirokchilar qatnashgan. 3D uslubida ishlangan modellar ham namoyish qilingan, ammo asosiy sovrin xitoylik Len Szinga nasib qilgan. Uning kolleksiyasidan an’anaviy usulda ishlangan, ammo bir modeldan turli usulda foydalansa bo‘ladigan liboslar o‘rin olgan. Dizayner karantindan keyin odamlar garderobida liboslar kam, ammo universal bo‘lishi kerak, deb hisoblaydi.
Izoh (0)