Kunlar isigani sayin ayol kishi garderobidagi libos va aksessuarlarni o‘zgartirishni istaydi. Qulay va chiroyli ko‘rinishga ega bo‘lgan baletkalar esa obrazning ko‘ngildagidek bo‘lishiga hissa qo‘shadi.
Tag qismi biroz baland bo‘lgan baletka tanlang
Tag qismi juda past poyabzal nafaqat tez yaroqsiz bo‘ladi, yurish va qomatga ham ta’sir qilmay qolmaydi. Aynan shu sabab ham hech bo‘lmaganda 0,5 sm baland bo‘lgan baletkalarni tanlash tavsiya qilinadi.
Paypoq va kolgotka kiymang
Havo harorati issiq bo‘lganda baletkalarni kolgotka va paypoq bilan kiyishga hojat yo‘q. Harorat sovuq va kolgotka kiymaslikning iloji bo‘lmaganda esa, yaxshisi, e’tiboringizni lofer va boshqa poyabzallarga qarating.
Sport uslubidagi boshqa kiyimlar bilan moslamang
Bir obrazda bir necha uslubni umumlashtirish urfda ekanligiga qaramay, baletka bilan bunday qilish tavsiya qilinmaydi.
Uchli variantlarga e’tibor qarating
Old qismi dumaloq va uchli variantdan birini tanlashingiz kerak bo‘lsa, ikkinchi variantga e’tibor qaratganingiz yaxshi. Uchli baletkalar bo‘yni baland, qomatni esa ixcham ko‘rsatadi.
Ahvoliga e’tibor bering
Poshnali tuflidagi kichkina qirilish ko‘zga tashlanmasligi mumkin, ammo baletkada emas. Bunday oyoq kiyim modelidagi arzimagan kamchilik ham e’tibor tortib, obrazni xunuk ko‘rsatadi.
Uzun kiyimlar bilan kiymang
Tovonga tushib turadigan yubka, ko‘ylak va shimlarni poshnali tufli bilan kiyganingiz yaxshi. Uchli baletkaning biroz poshnali varianti bo‘lsa, keng bichimli shim bilan kiyish mumkin, ammo aksariyat hollarda midi va mini uzunlik bilan moslagan yaxshi.
Minimal uslub bilan uyg‘unlashtiring
Ortiqcha e’tibor tortmaydigan, sipo kiyim-kechaklar bilan baletka kiyish ayni muddao. Zamonaviy trendlarni esa turli detallarga boy oyoq kiyimlar bilan moslaganingiz yaxshi.
Aksessuar va taqinchoq taqishni unutmang
Katta, noan’anaviy uzuk, zirak, taqinchoq yoki qalin kamar taqib, baletka kiyish obrazning o‘ziga xosligini ta’minlaydi.
Ofisga mo‘ljallangan kostyum bilan baletka kiymang
Baletka bilan ish kiyimi mos tushmaydi. Ofis obrazi uchun, yaxshisi, uchli tufli, lofer yoki krossovka kiying, faqat baletka emas.
Oqshom obrazlari uchun poshnali tufli kiying
Baletka qulay va chiroyli poyabzal ekani rost, ammo bu uning hamma kiyim bilan ham mos kelaverishini bildirmaydi. Masalan, oqshom tadbirlari va ziyofatlar uchun uning o‘rniga poshnali, noodatiyroq poyabzal tanlang. Rasmiy bo‘lmagan oqshom tadbirlari uchun esa uchli baletkalar mos tushadi.
Izoh (0)