“Ko‘rdinglarmi, fizikani yaxshi bilgan odam viloyat hokimi bo‘ladi” – Sherzod Shermatov bolalarga fizikadan dars o‘tib bergan Sirdaryo hokimi haqida (video)

Sirdaryo viloyati Mirzaobod tumanida Ahmad al-Farg‘oniy nomidagi fizika faniga ixtisoslashtirilgan tayanch maktabining ochilish marosimi bo‘lib o‘tdi. Bu haqda viloyat matbuot xizmati xabar berdi.

Tantanali ochilish marosimida viloyat hokimi G‘ofurjon Mirzayev, xalq ta’limi vaziri Sherzod Shermatov, tuman sektor rahbarlari, mahalla faollari hamda keng jamoatchilik vakillari ishtirok etdi.

Tadbirni viloyat hokimi G‘ofurjon Mirzayev kirish so‘zi bilan ochdi.

“Mazkur ziyo maskani mirzaobodliklarning talab va istaklaridan kelib chiqqan holda fizika faniga ixtisoslashtirildi. Tayanch maktabining barpo etilishi va zamonaviy jihozlanishi barkamol avlodga ko‘rsatilayotgan doimiy g‘amxo‘rlik ifodasidir. Ta’lim muassasasi nafaqat zamonaviy qiyofaga, balki mustahkam moddiy-texnika bazasiga ega bo‘ldi”, — dedi viloyat hokimi G‘ofurjon Mirzayev.

Ahmad al-Farg‘oniy nomidagi tayanch maktabi to‘rt qavatli qilib qurilgan bo‘lib, 330 o‘ringa mo‘ljallangan. Bo‘lajak fiziklar maktabida 23 ta o‘quv xonasi, 4 ta xorijiy tillar, axborot texnologiyalari xonasi, kimyo, biologiya, fizika laboratoriya xonalari, 1 ta ochiq sport maydoni hamda zamonaviy kutubxona sifatli ta’lim-tarbiya jarayonlarini tashkil etishga xizmat qiladi.

Maktabga tashrif davomida viloyat hokimi G‘ofurjon Mirzayev o‘quvchilarga fizika fanidan mahorat darsi o‘tib berdi. Mahorat darsi tugagandan so‘ng Xalq ta’limi vaziri Sherzod Shermatov viloyat hokimiga ishora qilib, “Mana ko‘rdinglarmi, fizikani bilgan odam viloyat hokimi bo‘ladi”, — deb hazil qildi.

“Fizika kerakli fan. Bu fandan butun tabiatni o‘rganasizlar”, – deb gapini davom ettirdi vazir.