Наманганлик эркак билан Telegram’да ёлғон ишқий муносабатга киришиб, кейин ушбу ёзишмаларни тарқатиш билан таҳдид қилган аёл қўлга олинди, дея хабар бермоқда Тергов департаменти.
Маълум қилинишича, 27-ёшли Ҳ.Қ. ариза билан мурожаат қилиб, унда 2021 йил март ойининг бошларида ўзини Наманган давлат университети талабаси деб таништирган Ю. исмли шахс билан Telegram мессенжери орқали яқиндан танишган ва у билан ишқий муносабатларга киришиши ҳақида гаплашган.
Сўнг Х.Қ.га ўзини О. деб таништирган шахс Ю. билан ўртасидаги ёзишмаларни интернет тармоғига чиқариб, оила аъзоларига маълум қилиш билан таҳдид қилади. У ушбу ёзишмаларни тарқатмаслик эвазига Ҳ.Қ.дан 1000 АҚШ доллари беришни талаб қилади.
Ушбу пулларни Чортоқ тумани Заргар кўчасида С.А. исмли фуқаро олаётган вақтида ИИБ ходимлари томонидан ушланган.
Олиб борилган терговга қадар текширув ҳаракатлари давомида Ҳ.Қ.дан 1000 доллар олган С.А. исмли фуқаро Ю. исмли шахснинг яқин дугонаси эканлиги, унинг илтимосига биноан ушбу пулларни олганлиги маълум бўлиб, 21 ёшли Ю.А. товламачилик йўли билан қўлга киритилган 1000 АҚШ доллари пулларни С.А.дан олган вақтида ушланиб, О. ва Ю. исмли шахслар ҳам унинг ўзи эканлиги аниқланган.
Мазкур ҳолат юзасидан Наманган шаҳри бўйича ИИО ФМБ ҳузуридаги тергов бўлими томонидан Ю.А.га нисбатан Жиноят кодексининг 165-моддаси 1-қисми (товламачилик) билан жиноят иши қўзғатилиб, гумон қилинувчи тариқасида жалб қилинган.
Аввалроқ бекободлик аёлнинг эски Telegram аккаунтидаги шахсий расмларини интернетда тарқатиб юбормаслик учун ундан 5 миллион сўм сўраган 15 ёшли қиз ушлангани, Хоразмда аёлнинг шахсий видеотасвирларни қариндошларига кўрсатиш билан қўрқитиб, ундан 1,5 минг доллар ва телефон талаб қилган йигит қўлга олингани ҳамда Тошкентда қизи ва йигит ўртасидаги муносабатларни сир сақлаш учун йигитнинг отасидан пул талаб қилган аёлга жиноят иши қўзғатилгани ҳақида хабар берилганди.
Изоҳ (0)