Ispaniya La Ligasining mart oyidagi eng yaxshi o‘yinchisi aniqlandi

“Real” hujumchisi Karim Benzema Ispaniya La Ligasining mart oyidagi eng yaxshi o‘yinchisi deb topildi.

O‘tgan oyda fransiyalik futbolchi Ispaniya chempionati doirasida o‘zi ishtirok etgan 3 o‘yinda 5 ta gol urdi. 33 yoshli hujumchi “Atletiko” (1:1) bilan bahsda bir marta raqib darvozasini ishg‘ol qilgan bo‘lsa, “Elche” (2:1) va “Selta”ga (3:1) qarshi uchrashuvlarda dubl qayd etdi.

Benzema mazkur sovrinni qo‘lga kiritish yo‘lida Yan Oblak (“Atletiko”), Yusuf en-Nesiri (“Sevilya”), Lionel Messi (“Barselona”), Daniel Vass (“Valensiya”), Borxa Iglesias (“Betis”) va Xerard Morenoni (“Vilyarreal”) ortda qoldirdi.

Karim Benzema La Liganing 2020/21-yilgi mavsumida 24 o‘yin o‘tkazib, 17 ta gol urdi va 6 ta golga hammualliflik qildi.

“Real” 28-turdan keyin 60 ochko bilan musobaqa jadvalida 3-o‘rinni band etib turibdi. Jamoa peshqadam “Atletiko”dan 6 ochkoga ortda qolmoqda.