“Barselona” Dortmundning “Borussiya” klubi hujumchisi Erling Holandni qo‘lga kiritishga jiddiy kirishdi.
ESPN nashrining xabar qilishicha, Mino Rayola va Holandning otasi “Barselona” prezidenti Xoan Laporta bilan muzokaralar olib borgan. Ta’kidlanishicha, uchrashuv 2,5 soat davom etgan.
“Barselona” Erlingni sotib olish uchun kredit olish variantini ko‘rib chiqmoqda. Klub 2019-yilda Antuan Grizmanni “Atletiko”dan 120 million yevroga sotib olganda ham shu yo‘lni tutgandi.
Laporta 20 yoshli futbolchi katalonlarning asosiy raqobatchisi bo‘lgan “Real”ga o‘tib ketishini istamayapti. Shuningdek, “Barsa” rahbariyati Holand transferi jamoa imiji uchun foydali bo‘lishiga ishonmoqda.
Ayrim ma’lumotlarga ko‘ra, futbolchining o‘zi faqat “Barselona” yoki “Real”ga o‘tishni istamoqda. Qolgan variantlar uni qiziqtirmayapti.
Rayola va katta Holand Barselonadagi muzokaralardan keyin Madridga yo‘l olgan. Futbolchining vakillari Holandga qiziqish bildirayotgan har bir klub bilan uchrashuv o‘tkazishi ma’lum bo‘lgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)