Испания Ла Лигасининг март ойидаги энг яхши ўйинчиси аниқланди

«Реал» ҳужумчиси Карим Бензема Испания Ла Лигасининг март ойидаги энг яхши ўйинчиси деб топилди.

Ўтган ойда франциялик футболчи Испания чемпионати доирасида ўзи иштирок этган 3 ўйинда 5 та гол урди. 33 ёшли ҳужумчи «Атлетико» (1:1) билан баҳсда бир марта рақиб дарвозасини ишғол қилган бўлса, «Элче» (2:1) ва «Сельта»га (3:1) қарши учрашувларда дубль қайд этди.

Бензема мазкур совринни қўлга киритиш йўлида Ян Облак («Атлетико»), Юсуф эн-Несири («Севилья»), Лионель Месси («Барселона»), Даниэль Васс («Валенсия»), Борха Иглесиас («Бетис») ва Херард Моренони («Вильярреал») ортда қолдирди.

Карим Бензема Ла Лиганинг 2020/21 йилги мавсумида 24 ўйин ўтказиб, 17 та гол урди ва 6 та голга ҳаммуаллифлик қилди.

«Реал» 28-турдан кейин 60 очко билан мусобақа жадвалида 3-ўринни банд этиб турибди. Жамоа пешқадам «Атлетико»дан 6 очкога ортда қолмоқда.