Fransiyada yana umummilliy karantin, Moldovada favqulodda holat e’lon qilindi, 15 million doza Johnson & Johnson vaksinasi yaroqsiz bo‘lib chiqdi. Koronaxabarlar

So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.

3-apreldan butun Fransiyada navbatdagi, pandemiya boshidan buyon uchinchi umummilliy karantin joriy qilinadi, u to‘rt hafta mobaynida amal qiladi. Bu haqda mamlakat prezidenti Emmanuel Makron o‘z telemurojaatida ma’lum qildi.

Karantin doirasida quyidagi cheklov choralari kiritiladi:

• xodimlar yana masofadan ishlashga qaytadi;
• eng zarur mahsulotlar sotiladigan do‘konlardan boshqa hammasi yopiladi;
• bolalar bog‘chalari, maktablar va kollejlar uch haftaga yopiladi. OTMlar talabalari haftada bir marta darsga kelishi mumkin;
• uzrli sababsiz uydan 10 kilometrdan uzoqroqqa ketish taqiqlanadi. Hududlararo safarlar faqat Pasxa bayramlari davrida mumkin.

Yangi karantinni joriy qilish zaruriyatini Makron Fransiyada koronavirusning “britancha” shtammi tarqalishi bilan izohladi. Uning qo‘shimcha qilishicha, hukumat COVID-19 bilan bog‘liq cheklovlarni may o‘rtalariga kelib bekor qilishni boshlashni rejalashtirmoqda.

Bungacha karantin Fransiyaning 19 ta departamentida joriy qilingan edi (mamlakatning qit’a qismida jami 96 ta departament). Bundan tashqari, mamlakatning butun hududida kechqurun yettidan ertalab oltigacha komendantlik soati amal qilib kelgandi, barlar, restoranlar, muzey, kinoteatr va boshqa jamoatchilik joylari yopilgan edi.

Fransiya ayni paytda dunyoda koronavirusga chalinganlar soni bo‘yicha to‘rtinchi o‘rinni egallab turibdi. Pandemiya boshidan buyon mamlakatda 4,6 million kishida virus aniqlangan, shularning 95,5 ming nafari vafot etgan. So‘nggi bir kecha-kunduzda 59 mingdan ortiq kasallanish holati qayd etilgan.

Moldovada koronavirus infeksiyasining tarqalishi xavfi tufayli 1-apreldan 30-mayga qadar favqulodda holat e’lon qilindi. Favqulodda holat rejimini kiritishni yoqlab Qonunchilik majlisining 101 a’zosidan 52 nafari ovoz berdi. Moldova prezidenti Mayya Sanduning “Harakat va birdamlik” partiyasidan chiqqan deputatlar favqulodda holat uchun ovoz bermadi.

Mamlakat bosh vaziri vazifasini bajaruvchi Aureliu Chokoy hukumat hozircha to‘liq lokdaun joriy qilmoqchi emasligini aytdi. Parlament qaroriga ko‘ra, xususan, quyidagi choralar kiritiladi:

• mamlakatdan chiqish va kirish qoidalari kuchaytiriladi;
• mamlakat hududida harakatlanish bo‘yicha alohida rejim joriy etiladi;
• ommaviy tadbirlar bekor qilinadi;
• oziq-ovqat mahsulotlari va eng zarur buyumlarning me’yorlashtirilgan iste’moli joriy qilinadi.

Moldovalik maktab o‘quvchilari onlayn-ta’limni davom ettiradi, dedi Chokoy. Uning aniqlik kiritishicha, respublikada epidemiologik vaziyat o‘ta yomonlashgan, vaqtinchalik hukumatda esa o‘z vaqtida choralar ko‘rish uchun vakolatlar yetarli emas. Mamlakatda COVID-19’ga chalinish holatlari og‘irlashgan, intensiv davolash bo‘limlari to‘lib ketgan. Ustiga-ustak, Moldovada koronavirusning “britancha” shtammi aniqlangan.

So‘nggi ma’lumotlarga ko‘ra, Moldovada koronavirusga chalinganlar soni 230 541 kishiga yetgan. 18-martdan mamlakatda vaksinatsiya kampaniyasi boshlandi.

Amerikaning Johnson & Johnson kompaniyasining Baltimordagi zavodi xodimlari bir necha hafta avval koronavirusga qarshi vaksina masalliqlarini aralashtirishda xatolikka yo‘l qo‘ygan, oqibatda 15 million doza dori yo‘qotilgan. Bu haqda The New York Times va Bloomberg xabar bermoqda.

Hodisa Emergent BioSolutions Inc korxonasida yuz bergan, unga esa AQSh oziq-ovqat va dorilar sifati bo‘yicha boshqarma (FDA) tomonidan Johnson & Johnson vaksinalarini ishlab chiqarish uchun sertifikat berilmagan edi.

Johnson & Johnson dori vositasining ushbu partiyasi sifat tekshiruvidan o‘tmaganini, standartlarga muvofiq kelmaganini ma’lum qildi.

Voqea tufayli FDA zavodni tekshiruvdan o‘tkazadi. AQSh tibbiy muassasalariga yetkazib berilgan vaksinalarning barcha partiyalari xavfsiz, chunki ular Johnson & Johnson’ning Niderlandiyadagi zavodlarida ishlab chiqarilgan, ammo keyingi partiyalar Baltimordagi zavoddan yetkazilishi rejalashtirilgan edi, endi esa tekshiruv tufayli yetkazib berish kechikadi.

Shuningdek:

• Finlyandiyada qisman lokdaun joriy qilishga qarshilik ko‘rsatildi. Finlyandiya parlamentining konstitutsiyaviy qo‘mitasi 31-mart kuni hukumatning koronavirusga chalinish darajasi yuqori bo‘lgan tumanlarda qisman lokdaun kiritish rejasini rad etdi. Bu qarordan keyin mamlakat bosh vaziri Sanna Marin hukumat lokdaun haqidagi qonun loyihasini qaytarib olishini ma’lum qildi. Uning aytishicha, mamlakatda epidemiologik vaziyat jiddiy bo‘lib qolmoqda.
• Shvetsiya hukumati koronavirus bilan kasallanish darajasi yuqori bo‘lgani sababli cheklov choralari muddatini uzaytirdi. Restoran, pab, kafe, do‘kon, sport zallari va muzeylar faoliyati bilan bog‘liq cheklovlar kamida 3-maygacha uzaytiriladi.
• Belgiyada esa huquq himoyachilari pandemiya sharoitida qabul qilingan favqulodda choralarning bekor qilinishiga erishdi. Bryussel birinchi instansiya sudi Belgiya davlatiga favqulodda choralaeni bekor qilish majburiyatini yuklovchi qarorni qabul qildi, buning uchun 30 kun muddat berildi.