AQSh Yaqin Sharqdan raketalar majmuasining bir qismini olib chiqishga qaror qildi. Prezident Jo Bayden Pentagonga Fors ko‘rfazidagi harbiylar sonini qisqartirishni buyurdi. Bu haqda The Wall Street Journal xabar berdi.
Ta’kidlanishicha, hududdagi “Patriot” zenit-raketa tizimining uchta batareyasi turgan joyidan ko‘chirilgan. Ulardan biri Saudiya Arabistonidagi Prince Sultan aviabazasida joylashgan edi. Bundan tashqari, “dunyoning boshqa qismlaridagi harbiy ehtiyojlarni qondirish” uchun AQSh samolyot tashuvchilari va kuzatuv tizimlarini ham olib chiqib ketadi. Gazetaning yozishicha, Pentagon boshqa texnikalar sonini ham qisqartirish ehtimoli bor.
Shuningdek, AQSh 2021-yilning may oyigacha Afg‘oniston hududidan barcha askarlarini olib chiqishni rejalashtirmoqda. Sobiq davlat kotibi Maykl Pompeoning so‘zlariga ko‘ra, Amerika armiyasi 2020-yildayoq Afg‘onistondagi harbiy faoliyatini ikki baravarga qisqartirgan edi. 2001-yil 11-sentabrda Nyu-Yorkdagi teraktdan so‘ng AQSh Afg‘onistonga o‘z qo‘shinlarini olib kirgan edi.
Avvalroq Amerika mudofaa vaziri Lloyd Jeyms Ostin Vashington o‘z qo‘shinlarini Afg‘onistondan olib chiqib ketishga shoshmoqchi emasligini ma’lum qilgan edi. Ostinning eslatishicha, AQSh ayni paytda o‘zining “Tolibon” harakati bilan kelishuvini puxtalik bilan o‘rganib, barcha tomonlar uning shartlariga amal qilayotganini aniqlashtirmoqchi.
AQSh davlat kotibi Entoni Blinken esa “Tolibon” vakillari bilan birga Afg‘oniston hukumatini shakllantirish uchun BMT rahbarligi ostida konferensiya tashkil etishni taklif qildi.
2020-yil noyabrida AQSh Afg‘oniston va Iroqda 2,5 ming nafardan harbiyni qoldirishini ma’lum qilgan. Qo‘shinlar 15-yanvargacha olib chiqib ketilgan. Afg‘onistondan 2 ming, Iroqdan 500 kishi chiqarib yuborilishi aytilgan edi. Trampning rejasiga ko‘ra, Iroq va Afg‘onistondan qo‘shinlar 2021-yil maygacha qaytarilishi kerak edi.
2021-yil yanvarida esa Afg‘oniston va Iroqdagi amerikalik harbiylar soni har bir mamlakatda 2,5 minggacha kamaygani xabar berildi.
Izoh (0)