АҚШ Яқин Шарқдан ракеталар мажмуасининг бир қисмини олиб чиқишга қарор қилди. Президент Жо Байден Пентагонга Форс кўрфазидаги ҳарбийлар сонини қисқартиришни буюрди. Бу ҳақда The Wall Street Journal хабар берди.
Таъкидланишича, ҳудуддаги «Патриот» зенит-ракета тизимининг учта батареяси турган жойидан кўчирилган. Улардан бири Саудия Арабистонидаги Prince Sultan авиабазасида жойлашган эди. Бундан ташқари, «дунёнинг бошқа қисмларидаги ҳарбий эҳтиёжларни қондириш» учун АҚШ самолёт ташувчилари ва кузатув тизимларини ҳам олиб чиқиб кетади. Газетанинг ёзишича, Пентагон бошқа техникалар сонини ҳам қисқартириш эҳтимоли бор.
Шунингдек, АҚШ 2021 йилнинг май ойигача Афғонистон ҳудудидан барча аскарларини олиб чиқишни режалаштирмоқда. Собиқ давлат котиби Майкл Помпеонинг сўзларига кўра, Америка армияси 2020 йилдаёқ Афғонистондаги ҳарбий фаолиятини икки бараварга қисқартирган эди. 2001 йил 11 сентябрда Нью-Йоркдаги терактдан сўнг АҚШ Афғонистонга ўз қўшинларини олиб кирган эди.
Аввалроқ Америка мудофаа вазири Ллойд Жеймс Остин Вашингтон ўз қўшинларини Афғонистондан олиб чиқиб кетишга шошмоқчи эмаслигини маълум қилган эди. Остиннинг эслатишича, АҚШ айни пайтда ўзининг «Толибон» ҳаракати билан келишувини пухталик билан ўрганиб, барча томонлар унинг шартларига амал қилаётганини аниқлаштирмоқчи.
АҚШ давлат котиби Энтони Блинкен эса «Толибон» вакиллари билан бирга Афғонистон ҳукуматини шакллантириш учун БМТ раҳбарлиги остида конференция ташкил этишни таклиф қилди.
2020 йил ноябрида АҚШ Афғонистон ва Ироқда 2,5 минг нафардан ҳарбийни қолдиришини маълум қилган. Қўшинлар 15 январгача олиб чиқиб кетилган. Афғонистондан 2 минг, Ироқдан 500 киши чиқариб юборилиши айтилган эди. Трампнинг режасига кўра, Ироқ ва Афғонистондан қўшинлар 2021 йил майгача қайтарилиши керак эди.
2021 йил январида эса Афғонистон ва Ироқдаги америкалик ҳарбийлар сони ҳар бир мамлакатда 2,5 минггача камайгани хабар берилди.
Изоҳ (0)