Yer — cheklangan resurs va ko‘p hollarda uning hosildorligi to‘g‘ri hamda samarali foydalanishga bog‘liq. Masalan, AQShda makkajo‘xorining hosildorligi bir gektardan 73 sentnerni tashkil etadi, Hindistonda esa bu atigi 25 sentnerga teng. Qizig‘i, gap faqat iqlimda emas, balki texnologiyalarda ham. Aynan texnologiyalar bugun kichik fermerlik xo‘jaliklari va yirik agrokompaniyalar raqobatbardoshligini belgilab bermoqda.
Istaymizmi, yo‘qmi, iqtisodiyotning qishloq xo‘jaligi kabi an’anaviy yo‘nalishida ham fundamental bilimlar va zamonaviy texnologiyalar asosiy o‘rinni egallaydi. Kelajakda bu tendensiya faqat kuchayadi, xolos. Aholi sonining o‘sishi bilan bog‘liq qishloq xo‘jaligi mahsulotlariga bo‘lgan talab muntazam ravishda ortib bormoqda va bu o‘z navbatida sohada faoliyat olib boruvchi tadbirkorlar zimmasiga yetarlicha mas’uliyat yuklaydi. Qaysi ma’nodaki, ular bozorga raqobatbardosh mahsulotlarni yetkazib berar ekan, ular o‘z ishini puxta bilishi, bunga aql bilan yondashishi ham muhim.
Davlat rahbari Oliy Majlisga yo‘llagan murojaatnomasida bu masalaga alohida to‘xtalib, sohaga ilm-fan va innovatsion texnologiyalar asosida yondashish zarurligini ta’kidlagan edi. Albatta, so‘nggi yillarda bu borada ko‘plab ijobiy ishlar amalga oshirilganini inkor etib bo‘lmaydi. Ammo innovatsion usul va yechimlarni qo‘llay olish qishloq xo‘jaligida faoliyat olib borayotgan tadbirkordan muayyan bilim va tajribani talab etadi.
Afsuski, bog‘dorchilik yo‘nalishi bo‘ladimi, issiqxonami — u yerda ishni to‘g‘ri tashkil qilish, tuproq hosildorligi, ekinlarni yangi usullarda yetishtirish kabilarga oid ma’lumotlarni tushunarli, aniq va lo‘nda yetkazib beruvchi o‘zbek tilidagi manbalar bizda deyarli yo‘q. Yuqorida keltirib o‘tganimiz kabi xorij mamlakatlarining qishloq xo‘jaligi sohasida erishayotgan yutuqlari zamirida nimalar yotganini o‘rganib, tahlil qilish, yuqori samaradorlikka ega tajribalarni to‘plab, mamlakatda qo‘llash velosipedni qayta kashf etish uchun sarflanadigan vaqtni ancha tejashi turgan gap. Prezident Shavkat Mirziyoyev aytganidek, sohaga ilm-fan yutuqlari va zamonaviy texnologiyalarni joriy etish bundan buyon ham ustuvor vazifalarimizdan biri bo‘lib qolar ekan, avvalo, qishloq xo‘jaligi sohasi vakillari uchun zarur bilimlarni o‘zida jamlagan qo‘llanma, kitobga ehtiyoj tug‘iladi (https://review.uz/oz/post/shavkat-mirziyoyev-ozbekiston-qishloq-xojaligi-xodimlariga-tabrik-yolladi).
Ma’lumki, mamlakat aholisining uchdan ikki qismini yoshlar tashkil etadi va ularni ish bilan ta’minlash dolzarb ijtimoiy masalalardan biridir. Mana shu nuqtayi nazardan, yoshlarni qishloq xo‘jaligi sohasiga qiziqtirish, yerimiz imkoniyatlari naqadar keng ekanligini ularga tushuntirish juda muhim. Sohaga oid xorij tajribasini o‘zida jamlagan hamda O‘zbekiston iqlimi sharoitlarini ko‘zda tutgan fundamental xarakterdagi qo‘llanma shu va ko‘plab boshqa masalalarga yechim bo‘lar edi.
Ma’lumotlar sheriklik huquqi asosida tayyorlandi.
Izoh (0)