Илм керак, билим керак — қишлоқ хўжалигидаги муваффақият омили ҳақида

Ер — чекланган ресурс ва кўп ҳолларда унинг ҳосилдорлиги тўғри ҳамда самарали фойдаланишга боғлиқ. Масалан, АҚШда маккажўхорининг ҳосилдорлиги бир гектардан 73 центнерни ташкил этади, Ҳиндистонда эса бу атиги 25 центнерга тенг. Қизиғи, гап фақат иқлимда эмас, балки технологияларда ҳам. Айнан технологиялар бугун кичик фермерлик хўжаликлари ва йирик агрокомпаниялар рақобатбардошлигини белгилаб бермоқда.

Истаймизми, йўқми, иқтисодиётнинг қишлоқ хўжалиги каби анъанавий йўналишида ҳам фундаментал билимлар ва замонавий технологиялар асосий ўринни эгаллайди. Келажакда бу тенденция фақат кучаяди, холос. Аҳоли сонининг ўсиши билан боғлиқ қишлоқ хўжалиги маҳсулотларига бўлган талаб мунтазам равишда ортиб бормоқда ва бу ўз навбатида соҳада фаолият олиб борувчи тадбиркорлар зиммасига етарлича масъулият юклайди. Қайси маънодаки, улар бозорга рақобатбардош маҳсулотларни етказиб берар экан, улар ўз ишини пухта билиши, бунга ақл билан ёндашиши ҳам муҳим.

Давлат раҳбари Олий Мажлисга йўллаган мурожаатномасида бу масалага алоҳида тўхталиб, соҳага илм-фан ва инновацион технологиялар асосида ёндашиш зарурлигини таъкидлаган эди. Албатта, сўнгги йилларда бу борада кўплаб ижобий ишлар амалга оширилганини инкор этиб бўлмайди. Аммо инновацион усул ва ечимларни қўллай олиш қишлоқ хўжалигида фаолият олиб бораётган тадбиркордан муайян билим ва тажрибани талаб этади.

Афсуски, боғдорчилик йўналиши бўладими, иссиқхонами — у ерда ишни тўғри ташкил қилиш, тупроқ ҳосилдорлиги, экинларни янги усулларда етиштириш кабиларга оид маълумотларни тушунарли, аниқ ва лўнда етказиб берувчи ўзбек тилидаги манбалар бизда деярли йўқ. Юқорида келтириб ўтганимиз каби хориж мамлакатларининг қишлоқ хўжалиги соҳасида эришаётган ютуқлари замирида нималар ётганини ўрганиб, таҳлил қилиш, юқори самарадорликка эга тажрибаларни тўплаб, мамлакатда қўллаш велосипедни қайта кашф этиш учун сарфланадиган вақтни анча тежаши турган гап. Президент Шавкат Мирзиёев айтганидек, соҳага илм-фан ютуқлари ва замонавий технологияларни жорий этиш бундан буён ҳам устувор вазифаларимиздан бири бўлиб қолар экан, аввало, қишлоқ хўжалиги соҳаси вакиллари учун зарур билимларни ўзида жамлаган қўлланма, китобга эҳтиёж туғилади (https://review.uz/oz/post/shavkat-mirziyoyev-ozbekiston-qishloq-xojaligi-xodimlariga-tabrik-yolladi).

Маълумки, мамлакат аҳолисининг учдан икки қисмини ёшлар ташкил этади ва уларни иш билан таъминлаш долзарб ижтимоий масалалардан биридир. Мана шу нуқтаи назардан, ёшларни қишлоқ хўжалиги соҳасига қизиқтириш, еримиз имкониятлари нақадар кенг эканлигини уларга тушунтириш жуда муҳим. Соҳага оид хориж тажрибасини ўзида жамлаган ҳамда Ўзбекистон иқлими шароитларини кўзда тутган фундаментал характердаги қўлланма шу ва кўплаб бошқа масалаларга ечим бўлар эди.

Маълумотлар шериклик ҳуқуқи асосида тайёрланди.