Toshkent shahar hokimi Jahongir Ortiqxo‘jayev chapani va ishbilarmon odam. Bu haqda Toshkent shahrining Sergeli tumani hokimi Elbek Shukurov YouTube’dagi Alter Ego dasturiga bergan intervyusida aytib o‘tdi.
“O‘zbek tilida ‘chapani’ degan so‘z bor. Bu dangalchi, mahalladan chiqqan, o‘z harakatlarini qandaydir bezamaydigan odam. To‘g‘ridan-to‘g‘ri, ochiqchasiga nimadir deydi, nimadir qiladi. To‘g‘risi, rahbar odam uchun, nazarimda, bu yaxshi xususiyat”, — dedi Elbek Shukurov.
Sergeli tumani hokimi Jahongir Ortiqxo‘jayevning tadbirkorlarga xos fikrlashini ham alohida qayd etib o‘tdi. Uning so‘zlariga ko‘ra, u yoki bu muammoni hal etishda poytaxt hokimida “mutlaqo farqli nuqtai nazar, farqli qarash bo‘ladi. Aynan mana shunday fikrlash ba’zan to‘g‘ri, ehtimol, g‘ayriodatiy yechim topishga yordam beradi”.
“U menejer sifatida, boshqaruvchi sifatida, katta biznesni, katta jamoani, ulkan kompaniyani boshqargan odam sifatida, mening nazarimda, eng mos odam. Siyosatchilar, albatta, so‘zini ehtiyot bo‘lib, tanlab gapiradigan, qandaydir harakatlarni tanlab qiladigan odamlar bo‘lsa kerak. Mana shu jihatdan, ehtimol, uni eng ko‘p muhokama qilishadi. Nimadir deb qo‘ydi, nimanidir o‘ylamadi, nimadir qilmadi, deb. Bu, balki, uni siyosatchidan farqlab turadigan va boshqaruvda, imidjni yaratishda xalal beradigan jihatidir”, — deya ta’rifladi Sergelining rahbari poytaxt hokimini.
Mavzuga doir: Sergeli tumani rahbari Elbek Shukurov hokim lavozimiga qanday tayinlanganini gapirib berdi
Uning ta’kidlashicha, Ortiqxo‘jayev bilan bog‘liq piar-xatoliklar dastlabki davrda Toshkent shahar hokimligida og‘riqli qabul qilingan, biroq keyin “hokimning o‘zi bunga qanday munosabat bildirayotganini ko‘rib”, vaziyat o‘zgargan.
“‘Lyubaya biznes xorosha’ degan gapni o‘zimiz ham tez-tez muhokama qilib turamiz, shahar hokimining o‘zi ham ba’zan shu gapni ishlatib hazil qiladi. Ba’zida uning oldida shu gapni aytgan vaqtlarimiz ham bo‘ladi. Agar qandaydir jiddiy muammoga taalluqli bo‘lmasa, og‘riqli qabul qilinmaydi”, — dedi Sergeli hokimi.
Ayni vaqtda, Elbek Shukurovning fikricha, toshkentliklarning shahar ma’muriyatiga nisbatan bahsli, ayrim vaqtlarda salbiy munosabatda bo‘lishi “ko‘p jihatdan odamlar faqat shahar hokimini bilishi”, uning o‘rinbosarlari va boshqa mas’ul shaxslarni tanimasligi bilan bog‘liq.
“Ko‘p yaxshi ishlar qilingan, biroq ularni tez unutamiz, hokimlik deganda ko‘proq xatolar xayolga keladi. Agar hokim o‘rinbosarlari va boshqa mas’ul shaxslar ko‘proq muloqot qilsa, media uchun nisbatan ochiqroq bo‘lsa, hokimlik haqida tasavvur butunlay boshqacha bo‘lardi”, — deb hisoblaydi Shukurov.
“Rahbar sifatida, u (Jahongir Ortiqxo‘jayev — “Daryo”) demokrat. Bu qarorlarni qabul qilish jarayonida ayniqsa yaqqol seziladi. U har doim o‘z o‘rinbosarlari, xodimlari bilan maslahatlashadi”, — deya qo‘shimcha qildi Sergeli tumani hokimi Elbek Shukurov.
Eslatib o‘tamiz, o‘z vaqtida Toshkent shahar hokimi o‘rinbosari va O‘zbekiston jismoniy tarbiya va sport vaziri o‘rinbosari lavozimlarida ishlagan Elbek Shukurov 2020-yil avgustida Sergeli tumaniga hokim etib tayinlangan edi.
Izoh (0)