Тошкент шаҳар ҳокими Жаҳонгир Ортиқхўжаев чапани ва ишбилармон одам. Бу ҳақда Тошкент шаҳрининг Сергели тумани ҳокими Элбек Шукуров YouTube’даги Alter Ego дастурига берган интервьюсида айтиб ўтди.
«Ўзбек тилида ‘чапани’ деган сўз бор. Бу дангалчи, маҳалладан чиққан, ўз ҳаракатларини қандайдир безамайдиган одам. Тўғридан-тўғри, очиқчасига нимадир дейди, нимадир қилади. Тўғриси, раҳбар одам учун, назаримда, бу яхши хусусият», — деди Элбек Шукуров.
Сергели тумани ҳокими Жаҳонгир Ортиқхўжаевнинг тадбиркорларга хос фикрлашини ҳам алоҳида қайд этиб ўтди. Унинг сўзларига кўра, у ёки бу муаммони ҳал этишда пойтахт ҳокимида «мутлақо фарқли нуқтаи назар, фарқли қараш бўлади. Айнан мана шундай фикрлаш баъзан тўғри, эҳтимол, ғайриодатий ечим топишга ёрдам беради».
«У менежер сифатида, бошқарувчи сифатида, катта бизнесни, катта жамоани, улкан компанияни бошқарган одам сифатида, менинг назаримда, энг мос одам. Сиёсатчилар, албатта, сўзини эҳтиёт бўлиб, танлаб гапирадиган, қандайдир ҳаракатларни танлаб қиладиган одамлар бўлса керак. Мана шу жиҳатдан, эҳтимол, уни энг кўп муҳокама қилишади. Нимадир деб қўйди, ниманидир ўйламади, нимадир қилмади, деб. Бу, балки, уни сиёсатчидан фарқлаб турадиган ва бошқарувда, имиджни яратишда халал берадиган жиҳатидир», — дея таърифлади Сергелининг раҳбари пойтахт ҳокимини.
Мавзуга доир: Сергели тумани раҳбари Элбек Шукуров ҳоким лавозимига қандай тайинланганини гапириб берди
Унинг таъкидлашича, Ортиқхўжаев билан боғлиқ пиар-хатоликлар дастлабки даврда Тошкент шаҳар ҳокимлигида оғриқли қабул қилинган, бироқ кейин «ҳокимнинг ўзи бунга қандай муносабат билдираётганини кўриб», вазият ўзгарган.
«‘Любая бизнес хороша’ деган гапни ўзимиз ҳам тез-тез муҳокама қилиб турамиз, шаҳар ҳокимининг ўзи ҳам баъзан шу гапни ишлатиб ҳазил қилади. Баъзида унинг олдида шу гапни айтган вақтларимиз ҳам бўлади. Агар қандайдир жиддий муаммога тааллуқли бўлмаса, оғриқли қабул қилинмайди», — деди Сергели ҳокими.
Айни вақтда, Элбек Шукуровнинг фикрича, тошкентликларнинг шаҳар маъмуриятига нисбатан баҳсли, айрим вақтларда салбий муносабатда бўлиши «кўп жиҳатдан одамлар фақат шаҳар ҳокимини билиши», унинг ўринбосарлари ва бошқа масъул шахсларни танимаслиги билан боғлиқ.
«Кўп яхши ишлар қилинган, бироқ уларни тез унутамиз, ҳокимлик деганда кўпроқ хатолар хаёлга келади. Агар ҳоким ўринбосарлари ва бошқа масъул шахслар кўпроқ мулоқот қилса, медиа учун нисбатан очиқроқ бўлса, ҳокимлик ҳақида тасаввур бутунлай бошқача бўларди», — деб ҳисоблайди Шукуров.
«Раҳбар сифатида, у (Жаҳонгир Ортиқхўжаев — «Дарё») демократ. Бу қарорларни қабул қилиш жараёнида айниқса яққол сезилади. У ҳар доим ўз ўринбосарлари, ходимлари билан маслаҳатлашади», — дея қўшимча қилди Сергели тумани ҳокими Элбек Шукуров.
Эслатиб ўтамиз, ўз вақтида Тошкент шаҳар ҳокими ўринбосари ва Ўзбекистон жисмоний тарбия ва спорт вазири ўринбосари лавозимларида ишлаган Элбек Шукуров 2020 йил августида Сергели туманига ҳоким этиб тайинланган эди.
Изоҳ (0)