Sergeli tumani rahbari Elbek Shukurov hokim lavozimiga qanday tayinlanganini gapirib berdi

Sergeli tumani hokimi Elbek Shukurov YouTube’dagi Alter Ego loyihasiga bergan intervyusida amaldagi lavozimiga qanday tayinlangani haqida gapirib berdi. Uning so‘zlariga ko‘ra, hammasi koronavirus pandemiyasi ayni avjiga chiqqan vaqtda, u hali jismoniy tarbiya va sport vaziri o‘rinbosari sifatida ishlayotganida boshlangan.

“Men shahar hokimining oldiga kelib, ‘Qanday yordam bera olaman?’, deb so‘radim, chunki tibbiyot uchun mas’ul yo‘nalishni boshqarayotgandim. O‘shanda u ‘O‘zekspomarkaz’ bilan shug‘ullanishni so‘radi (“O‘zekspomarkaz”da koronavirusga chalingan bemorlar uchun taqsimot markazi tashkil etilgan edi, u bir necha oy ishladi — “Daryo”). Biz hokim bilan birgalikda ishni tashkil qildik. Men doimiy o‘sha yerda bo‘ldim, yashadim. Bu, adashmasam, iyul oyida edi”, — dedi hokim.

Taxminan shu vaqtda Sergeli tumani rahbari lavozimidan ozod qilingan. “Bir kuni tushlik vaqtida Jahongir Ortiqxo‘jayev: ‘Mana, sen sportga ketib qolding, vaholanki, yaxshi ishlayotgandik’, deb qoldi”. Elbek Shukurov bunga javoban “qalban har doim hokimlikda ekani va kelajakda u yerga qaytish niyati bor”ligini aytgan.

“Oradan ikki-uch hafta o‘tib, u menga: ‘Sen qalban hokimlikda eding-ku, men seni Sergeli tumani hokimi lavozimiga tavsiya qildim. Nima deysan shunga?’, dedi. Men: ‘Siz bilan ishlashga jon deb boraman’, deb javob berdim”, — deb xotirladi Elbek Shukurov.

Intervyu davomida Elbek Shukurov hokimlarni saylash masalasiga qanday munosabatda ekanini ham bildirib o‘tdi. Uning ta’kidlashicha, “biz yaqin vaqt ichida bu jarayonga yetib kelamiz”.

“Hokimlarni to‘g‘ridan-to‘g‘ri saylash masalasiga kelsak, prezident yaqinda bu masalaga to‘xtalib, biz hali tayyor emasligimizni ta’kidladi. Biroq, ishonchim komil, biz albatta bu jarayonga yetib kelamiz. Asosiysi, saylovlar vaqtidagi to‘g‘ri shaffof tizimni ta’minlash kerak”, — dedi Sergeli tumani hokimi.

Eslatib o‘tamiz, Toshkent shahar hokimining sobiq o‘rinbosari hamda jismoniy tarbiya va sport vazirining sobiq o‘rinbosari Elbek Shukurov 2020-yilning avgust oyida Sergeli tumani hokimi etib tayinlangan edi.