Buyuk Britaniya O‘zbekistondagi “shotland” kompaniyalaridan xavotirda. Bu haqda The Times’da e’lon qilingan maqolaga tayanib, Spot xabar berdi.
Misol sifatida 2020-yilning kuzida Jahon banki tomonidan uch yilga “qora ro‘yxat”ga kiritilgan NovoLine Resources kompaniyasi keltirilgan.
NovoLine Resources O‘zbekiston Sog‘liqni saqlash vazirligining anesteziologik va respirator uskunalarni yetkazib berish tanlovida yutib chiqqan. Xaridlarni moliyalashtirgan Jahon bankining aniqlashicha, kompaniya qalbaki hujjatlar, jumladan, soxta moliyaviy hisobotlarni taqdim etgan.
“Buyuk Britaniyada ro‘yxatdan o‘tgan kompaniyalar xorijda noqonuniy maqsadlarda foydalanilayotgani to‘g‘risidagi xabarlar tobora ortmoqda”, — deydi deputat Elison Tyuliss.
Maqola mualliflarining yozishicha, NovoLine Resources aslida kimga tegishli ekanligini yoki Jahon banki moliyalashtirgan shartnomalardan daromadni kim qo‘lga kiritganini aniqlashning imkoni yo‘q. Firmaning na sayti, na telefon raqami va na elektron pochta manzili bor. Kompaniya Edinburgdagi binoda ro‘yxatdan o‘tkazilgan bo‘lib, u yerda itlarni parvarishlash biznesi joylashgan.
Maqolada ta’kidlanishicha, ikki yil oldin boshqa bir xalqaro tashkilot — BMT Taraqqiyot dasturi O‘zbekistonda firibgarlik sxemalarini amalga oshirgan to‘rtta “shotland” firmasiga sanksiya qo‘llagan. NovoLine Resources kabi ularning barchasi mas’uliyati cheklangan sheriklik yoki SLP hisoblanadi. Bu kabi korxonalarni internetda ikki ming yevroga xarid qilish mumkin.
Izoh (0)